Венесуэлийн дотоод хямралыг зохицуулах талаар Норвеги улс зуучлан яриа хэлэлцээр хийх гэж хүчин чармайлт гаргаж байгааг Венесуэлийн сөрөг хүчин дэмжиж оролцох ч Ерөнхийлөгч Николас Мадурогийн Засгийн газартай хэлэлцээр хийхгүй гэж тус улсын сөрөг хүчний удирдагч Хуан Гуайдо мэдэгджээ. Боливарын бүгд найрамдах улсын гүйцэтгэх засаглалыг эсэргүүцэгчдийн тэргүүн ням гарагт Лара мужид үг хэлэхдээ ингэж мэдэгдсэн байна.

“Норвегийн гаргасан санаачилгыг бид дэмжих ёстой, гэхдээ Н.Мадурогийн дэглэмийн үлгэрийг ашиглах ёсгүй” гэж Х.Гуайдогийн хэлснийг El Nacional хэвлэл эш татжээ. “Норвегийн талаас гаргаж байгаа зуучлах үйл ажиллагаанд оролцоно. Гэхдээ нөгөө талаас энэ бол хэлэлцээр биш, яриа биш” гэжээ. Х.Гуайдогийн хэлснээр бол энэ уулзалт Венесуэлийн Засгийн газрыг солих, шинэ сонгууль явуулахад хүрэх ёстой гэнэ. “Ингэж чадахгүй бол бид гудамжинд үлдэж, ардчиллыг сэргээхийн төлөө тэмцэх л болно” гэж сөрөг хүчний удирдагч хэлжээ.

“Венесуэлийн гол гол улс төрийн хүчнүүдийн төлөөлөгчдийг дараа долоо хоногт Ослод ирж харилцаа тогтоох, ойлголцох үйл явцаа үргэлжлүүлэхээр эргэн ирэхээр шийдлээ” гэж Норвегийн Гадаад хэргийн яам бямба гарагт мэдэгдсэн юм. Венесуэлийн парламент Үндэсний ассамблейн депутат Сталин Гонсалес үүний өмнө Осло бол сөрөг хүчний болон Засгийн газрын төлөөлөгчдийн шууд харилцаа тогтоох газар биш гэж мэдэгдсэн юм.