Сирийн умард нутгийн Эль-Баб хотын авто вокзалд болсон дэлбэрэлтийн улмаас амь үрэгдсэн хүний тоо 18 хүрлээ гэж “Анадолу” агентлаг энэ 16-ны өдөр мэдээллээ. Урьдчилсан байдлаар 30 хүн бэртэж шархадсан гэж мэдээлэлд дурджээ. Өөр бас хүмүүс амь үрэгдсэн эсэхийг нягталж байгаа юм байна. Дэлбэрэлтийн улмаас зэргэлдээх байшин барилга, авто машинууд өртсөн байна.
Энэ дэлбэрэлтийг Курдистаны ажилчны нам үйлдсэн гэж Туркийн батлан хамгаалах яам мэдээлж байна. Аравдугаар сарын 9-22-ны өдрүүдэд Турк Сири дэх Курдистаны ажилчны намын болон “Лалын улс” зэвсэгт бүлэглэлийн эсрэг “Энхтайвны эх булаг” цэргийн ажиллагаа явуулсан. Аравдугаар сарын 17-нд Турк улс АНУ-тай курдуудийн эсрэг байлдааны ажиллагаагаа 120 цагийн дотор зогсоох хэлэлцээр байгуулж хоёр тал өмнө нь террористуудын хяналтад байсан газар нутагт хяналт тавих талаар тохиролцсон юм. Үүний дараа турктэй хил залгаа нутгаас курдуудийг гаргаж дууссанаа АНУ аравдугаар сарын 23-нд зарласан юм.