Украины Үндэсний аюулгүй байдлын зөвлөлийн нарийн бичгийн дарга асан Александр Данилюк надад Украины Батлан хамгаалахын сайд болооч гэсэн санал нэг бус удаа тавьж байсан гэж АНУ-ын Ерөнхийлөгч Дональд Трампын эгүүлэн татах ажиллагааны гэрч Америкийн армийн дэд хурандаа Александер Виндман мэдэгдсэн байна.
Виндман Украинд төрсөн, америкийн иргэн Цагаан ордон дахь Украины асуудлаарх шинжээч, дэд хурандаа цолтой юм. Тэрээр “орос, украин хэл мэднэ, англиар дунд зэрэг” гэнэ.
Данилюк өөрийг нь батлан хамгаалах салбарыг удирдаач гэж гурван ч удаа санал тавьж байсан гээд ерөнхийлөгч Владимир Зеленскийг төрийн тэргүүний тангараг өргөх үеэр ингэж санал тавьсан гэжээ.
Харин Цагаан ордны шинжээч тэр бүрийд нь татгалзаж байсан гэнэ. “Энэ бол нэр төрийн хэрэг, гэхдээ би америк хүн. Би энд бүр жаахан байхдаа ирсэн. Би тэр саналыг огт бодож үзэлгүйгээр шууд л татгалзсан. Энэ чинь инээдэмтэй санаа шүү дээ” гэж тэр хэлсэн байна. Виндман бас үүний өмнө Дональд Трампын Украины тэргүүн В.Зеленскийтэй ярьсан яриаг “ухаангүй явдал” гэж хэлж байсан юм.
АНУ-ын Ерөнхийлөгч Дональд Трампыг Украинд цэргийн тусламж өгөхөөр амлаж хариуд нь өөрийн улс төрийн гол өрсөлдөгч Жо Байдены эсрэг мөрдөн шалгах ажиллагаа явуулахыг хүссэн хэмээн сэжиглэж Ардчилсан намынхан төрийн тэргүүний эсрэг эгүүлэн татах ажиллагаа эхлүүлээд байгаа юм. Харин Д.Трамп өөрөө болохоор “Би Украиныг авлигын эсрэг тэмцээч гэж уриалсан, ямар нэг болзол тулгаагүй” гэж байгаа юм. Энэ мягмар гарагт Төлөөлөгчдийн танхим эгүүлэн татах тухай сонсголын хоёр дахь долоо хоногийг эхлүүлсэн юм.