Эсэргүүцлээ илэрхийлэн Хонконгийн техникийн их сургуулийг эзлээд  хэдэн өдрийн турш цагдаагийнхантай мөргөлдсөөр байсан  хүмүүсээс 800 орчим нь сургуулийн хичээлийн байрнаас тайван замаар гарлаа гэж Хонконгийн цагдаагийн мэдээлэлд дурджээ.
Засгийн газрыг эсэгүүцэгчид энэ Политехникийн их сургуулийн байрыг эзлээд долоо хоносон юм. Эсэргүүцэгчид цагдаагийнхантай мөргөлдөж, эмх замбараагүй байдал эхэлсний дараа арван нэгдүгээр сарын 17-ны ням гаргийн орой цагдаагийнхан сургуулийн байрыг бүсэлсэн юм.
“23.00 цагийн байдлаар нийт 800 орчим хүн Политехникийн их сургуулийн байрыг орхин гарч энэ үйл явдлыг мөрдөн шалгах ажиллагаанд цагдаагийнхантай хамтран ажиллахаар боллоо” гэж цагдаагийн газрын мэдээлэлд дурдсан байна.
Энэ хүмүүсийн 300 нь 18 насанд хүрээгүй хүүхдүүд байна гэжээ. Оройн 22.00 цагийн үед сайн дурын-эмнэлгийн ажилтан 20 хүн сургуулийн байрнаас гарсан бол 23.00 цагийн үед баг өмссөн 10 хүн гол хаалгаар гаран зугтахыг оролдсоныг цагдаагийнхан саатуулсан. Улаан загалмайн байгууллагын мэргэжилтнүүд их сургуулийн байранд бэртэж гэмтсэн хүмүүст эмнэлгийн тусламж үзүүлж байгаа гэнэ.
Эмч нарын мэдэгдсэнээр бол их сургуулийн орчимд 280 хүн бэртэж гэмтсэнээс 12-ыг нь эмнэлэгт хүргэжээ. Одоогийн байдлаар их сургуулийн байранд 100 гаруй хүн үлдээд бууж өгөх бодолгүй байгаа гэнэ. Цагдаагийнхан тэнд байгсдыг тайван байдлаар сургуулийн байрнаас гарахыг уриалж байна.