Австрийн Браунау-на-Инне хот дахь Гуравдугаар рейхийн тэргүүүн Адольф Гитлерийн төрсөн байшинг Австрийн эрх баригчид цагдаагийн хэсгийн байр болгохоор шийдвэрлэлээ гэж Дотоод хэргийн яамны эх сурвалжаас авснаа Österreich.at хэвлэл мэдээлсэн байна.
“Дахин төлөвлөж засварласны дараагаар энэ байшинд тойргийн цагдаагийн удирдах газар, Браунау-на-Иннегийн цагдаагийн хэсэг байрлах болно” гэж мэдээлэлд дурджээ. Цагдаагийнхан “энэ байшинг цагдаагийн албан зориулалтаар засварлан ашигласнаар, цаашид энэ барилга хэзээ ч үндэсний социализмыг санагдуулахаа болино” гэж мэдэгдсэн байна.
Гитлерийн төрсөн байшинг  засварлах гэж байгаа нь бүр наймдугаар сард тодорхой болсон юм. Австрийн Дотоод хэргийн сайд Вольфганг Пешорн тэгэхэд “энэ байшинг ашиглах шинэ хувилбар олно” гэж хэлж байсан юм. Байшинг эзэмшиж байсан хүнд 810 мянган еврогийн нөхөн олговор өгчээ. Гитлерийн төрсөн энэ байшинг 1938 онд нацистууд худалдаж авсан ч анхны эзэн нь 1952 онд эргүүлэн авсан юм байна. Ингээд эндээ номын сан байгуулж байснаа сүүлдээ хөгжлийн бэрхшээлтэй хүмүүсийн асрах газар болгосон байна. 2016 оны аравдугаар сард Австрийн засгийн газар байшинг буулгахаар шийдэж байснаа сүүлдээ буулгахын оронд гадаад төрхийг нь танигдахгүй болтол  өөрчлөн засварлахаар шийдсэн юм байна.