БНХАУ-ын Засгийн газрын саналаар Хонконгийн засгийн газрын тэргүүн Кэрри Лам хятадын тусгай захиргааны цагдаагийн даргын албан тушаалд Крис Таныг томиллоо хэмээн Синьхуа агентлаг мягмар гарагт мэдээлсэн байна. “БНХАУ-ын Үндсэн хуульд Сянганы захиргааны тусгай бүсийн тухай заасанчлан Сянганы захиргааны дарга Кэрри Ламд цагдаагийн комиссар Стивен Лог албан тушаалаас нь чөлөөлж Крис Таныг энэ албан тушаалд томилуулахаар тогтоолоо” гэж мэдээлэлд дурджээ.
Энэ томилгоо тохиолдлын ч биш, энэ тухай мэдээлэл Хонконгийн хэвлэлүүдэд сүүлийн долоо хоногт тархаад байсан юм. Цагдаагийн өмнөх дарга Стивен Ло 2015 оноос хойш энэ албан тушаалд ажиллаж байгаа юм. Харин шинэ томилогдсон Крис Тан нь Хонконгийн хууль сахиулах байгууллагад 1987 оноос ажиллаж 2018 оны арваннэгдүгээр сараас хотын цагдаагийн комиссарын орлогчоор ажиллаж байгаа юм.
Цагдаагийн шинэ тэргүүн Крис Тан ард иргэдийн идэвхтэй дэмжлэггүйгээр цагдаагийн байгууллага дангаараа энэ эсэргүүцлийн хөдөлгөөнийг эцэс болгож чадахгүй хэмээн South China Morning Post сонинд өгсөн ярилцлагадаа дурдсан байна.

“Ард иргэд дуугүй суулгүйгээр эсэргүүцлийн хөдөлгөөний талаар үгээ хэлэх ёстой” гэж Крис Тан онцлон тэмдэглэжээ. Дуугүй сууж, тэвчээртэй хандах нь “хэт даврагсдыг улам өөгшүүлж цаашдаа эмх замбараагүй байдалд хүргэнэ” гэж тэр хэлсэн байна.
“Олон нийт энэ хүчирхийллийн талаар энэ таван сарын хугацаанд эртхэн үгээ хэлж дуугарсан бол өнөөгийн ийм байдалд арай хүрэхгүй байсан. Нийт олноороо шүүн хэлэлцэж, эмх замбараагүй байдал үүсгэгчдэд дарамт үзүүлж байж л бид энэ байдлыг эцэс болгож чадна” гэж шинэ комиссар тангараг өргөх үеэрээ мэдэгджээ.
Крис Тан жагсагчид, баг зүүсэн залуучууд цагдаагийн ажилтнуудад хүч хэрэглэн, харгислаж байгаад сэтгэл зовниж байгаагаа илэрхийлээд цагдаагийнхан эрх мэдлээ хэтрүүлэн иргэдийн эсрэг хүч хэрэглэж байна гэсэн буруутгалыг хүлээн зөвшөөрөхгүй гэдгээ бас мэдэгдсэн байна. “Манай олон офицер хэрцгий дайралтыг няцааж, өөрсдийгөө хамгаалахын тулд зэвсэг хэрэглэж байгаагаас биш, жагсагчдын эсрэг ашиглахгүй байгаа” гэж тэр хэлжээ.