Даваа гарагт Гүржийн парламентын байрны өмнө олон нийтийн жагсаал болсны дараа тэдний зарим нь шөнөдөө энд хоноглохын тулд Руставелийн талбайд майхан босгож эхэлсэн байна. Жагсагчдын нэг нь “Үндэсний нэгдмэл хөдөлгөөн” намын  зүтгэлтэн Демна Цурцумия  РИА Новости агентлагийн сурвалжлагчид  ярьсан байна. “Бид тарахыг бодохгүй байна. Зарим маань бүр энд хоноглох гэж  парламентын байр луу орох хаалганы тэнд майхан босгож байна. Бид энэ жагсаал, хаалтаа хууль бус гэж үзэхгүй байгаа болохоор үргэлжлүүлнэ. Өөр нарийн төлөвлөгөө маань дараа тодорхой болно” гэж тэр хэлжээ. 

Жагсагчид шөнөдөө дулаан байхын тулд мод авчирч байсан хэд хэдэн машиныг цагдаагийнхан буцаасан байна. Дотоод явдлын яамны зүгээс энэ талаар ямар нэг тайлбар өгөөгүй. Харин иргэд майханд байгаа хөдөлгөөнийхөнд халуун хол цай, хүнс авчирч өгч байгаа гэнэ.

Тусгай хүчний цэргүүд парламентын ордны дэргэд жагсагчдыг тараахын тулд  усан буу хэрэглэсэн байна. Тусгай тасгийнхан хууль тогтоох байгууллагын эргэн тойрны гудамжуудад эргүүл хийж байгаа юм. Жагсагчдаас хэд хэдэн хүнийг баривчлан саатуулсан бол эсэргүүцлийн хөдөлгөөнийхнөөс хүн бэртэж гэмтэн эмнэлгийн тусламж авсан байна. Жагсаалд оролцогсод хууль сахиулагчид нийт 20 хүнийг саатуулсан гэж баталжээ.

Гүржийн парламент Үндсэн хуульд өөрчлөлт оруулахдаа сонгуулийн системийг пропорционал системээр явуулахгүй хэмээн баталсан юм.   Үүний дараа олон нийтийн жагсаал цуглаан эхэлж эсэргүүцэж эхэлсэн. Сөрөг хүчнийхэн ээлжит бус сонгуулийг пропорционал системээр явуулах, сонгуулийн бусад загваруудыг бий болгох зэрэг шаардлага тавьж байгаа юм.