Туркийн Ерөнхийлөгч Тайип Эрдоган  ард иргэдээ  ам.доллараас татгалзаж үндэсний мөнгөн тэмдэгт лирээ илүү ашиглах эргэлт гаргахыг уриалсан байна. Тэрээр энэ долоо хоногийн мягмар гарагт парламентад үг хэлэх үеэрээ ингэж мэдэгдсэнийг Ntv телевиз шууд дамжуулжээ.

“Манай эдийн засаг сэргэх үйл явц руугаа бүрэн урагшилж байна: Бүхий л баримтууд үүнийг нотолж байна. Харин бүгд л биднийг ёроол руугаа явж байна гэж ярьж байна. Энэ долларыг хая, үндэснийхээ валют руу эргэж оръё. Туркийн лир цаашид унахгүй” гэж тэр хэлсэн байна.

Эрдоган ингэж ард иргэдээ үндэсний бахархлаа харуулан эх орондоо халамж үзүүлэхийг уриалжээ. Тэрээр “Хэн эх орондоо итгэж түүнд халамж тавина тэр хожиж, ялан дийлнэ” гэсэн байна.

Турк улс сүүлийн жилүүдэд худалдаа гүйлгээнд, ялангуяа  дотоод худалдаандаа  долларын эзлэх хувийг хязгаарлахыг эрмэлзэж байгаа юм. Анкара гадаад худалдаанд ч гэсэн үндэсний валютаар тооцоо хийхэд шилжих талаар олон улсын хэлэлцээр байгуулаад байгаа юм.