Энэ удаа Их Британийн нийслэлд болж байгаа НАТО-гийн гишүүн орнуудын дээд хэмжээний уулзалтад оролцохоор АНУ-ын Ерөнхийлөгч Дональд Трамп Лондонд ирлээ. Умард Атлантын эвслийн энэ удаагийн уулзалтын гол шүүмжлэл Францын Ерөнхийлөгч Эммануэль Макроны эсрэг чиглэж магадгүй байна.
Дональд Трамп, Эммануэль Макрон хоёрын харилцаа хоёр жилийн өмнө тун дотно байсан бол сүүлийн үед харьцангуй хөндийрөөд байгаа гэж “Аксиос” хэвлэл бичсэн байна. Францын Ерөнхийлөгчийн саяхны “НАТО-гийн тархи үхжиж байна”, “АНУ-ын өнөөгийн удирдлага Европоос нүүр бурууллаа” гэсэн тайлбарууд нь Д.Трампын дургүйг ихэд хүргэж байгаа юм. Тэгэхээр АНУ-ын Ерөнхийлөгч энэ удаа НАТО-гийн талаар илүү таатай үг хэлж мэдэх юм. Дональд Трамп 2017 онд Умард Атлантын гэрээний тав дахь заалтыг батлахаас татгалзаж байсан бол өнгөрсөн онд Европын улсууд зардлаа нэмэгдүүлэхгүй бол НАТО-гоос гарна гэж сүрдүүлж байсан удаатай. Ирэх 2020 оны эцэс гэхэд Европын улс орнууд татвараа 2016 онтой харьцуулахад 130 тэрбум ам.доллароор нэмэгдүүлнэ гэж НАТО-гийн Ерөнхий нарийн бичгийн дарга Йенс Столтенберг өнгөрсөн баасан гарагт мэдэгдсэн.
НАТО-гийн дээд хэмжээний уулзалт болж байгаа Их Британид арав хоногийн дараа парламентын сонгууль болно. Энэ бол Ерөнхий сайд Борис Жонсон, Брекситийн хувь заяаг шийдэх гол алхам. Дональд Трамп Их Британи Европын холбооноос гарах эсэх нь тэдний дотоод асуудал, ер нь гарах нь ч зүйтэй  гэж мэдэгдсэн ч Б.Жонсон үүнийг нэг их тоохгүй, харин ч британичууд Д.Трампад нэг их дуртай биш гэж байна.
Дональд Трамп НАТО-гийн дээд хэмжээний уулзалтын үеэр Германы канцлер Ангела Меркель, Францын Ерөнхийлөгч Эммануэль Макрон нартай хэлэлцээр хийх юм байна. Үүнээс долоо хоногийн дараа Парист Украины асуудлаарх Франц, Герман, Украин,Орос улсуудын оролцдог Нормандын дөрвөлийн уулзалт бас болно.