Хонконгод цэргийн хөлөг онгоц, нисэх онгоц байрлуулах гэсэн АНУ-ын хүсэлтийг Хятад улс авч үзэхийг хүсэхгүй байна гэж БНХАУ-ын Гадаад хэргийн яамны албан ёсны төлөөлөгч Хуа Чуньин мэдэгджээ. Үүний зэрэгцээ Бээжин АНУ-ын Human Rights Watch, NDI,  Freedom House зэрэг засгийн газрын бус хэд хэдэн байгууллагын эсрэг хориг тавьж байгаагаа мэдэгдсэн байна. Энэ бол Вашингтон Хонконгод  иргэний эрх, ардчиллыг хамгаалах  тухай хууль баталсны хариу арга хэмжээ. “Энэ бүхэн хэзээ дуусах нь АНУ-ын цаашдын алхмаас шалтгаална” гэж Гадаад хэргийн яамны төлөөлөгч хэлжээ. Саяхан АНУ-ын Ерөнхийлөгч Дональд Трамп Хонконгод хүний эрх, ардчиллыг хамгаалах тухай болон, тийшээ цагдаагийн тоног төхөөрөмж, хэрэгсэл нийлүүлэхийг хориглох гэсэн хоёр хуульд гарын үсэг зурсан юм. Үүнээс үүдэн Бээжин хариу арга хэмжээ авахаа мэдэгдээд байгаа нь энэ.

  Өнгөрөгч зургадугаар сарын эхнээс Хонконгод гэмт хэрэгтэн, сэжигтнийг эх газрын хятадад шилжүүлэн өгөх хуулийн төслийг эсэргүүцсэн олон нийтийн жагсаал цуглаан болж эхэлсэн. Сүүлдээ энэ эсэргүүцэл эмх замбараагүй байдал болж хувирахад хүрсэн учраас хуулийн төслийг эргүүлэн татсан ч жагсаал цуглаан намжаагүй байгаа юм. Харин ч эмх замбараагүй байдал үргэлжилсээр хууль сахиулагчид нь жагсагчдын эсрэг нулимс асгаруулаг хий, бороохой хаймар сум, бүр галт зэвсэг хэрэглэж байгаа юм. Энэ хагас жилийн хугацаанд Хонконгод нийтдээ 900 орчим жагсаал цуглаан марш болж, хууль сахиулагчид нийт зургаан мянга гаруй хүнийг саатуулаад байна