НАТО-гийн гишүүн орнуудын Ерөнхийлөгч, Засгийн газрын тэргүүнүүд Польш болон Балти орчмын орнуудын цэргийн аюулгүй байдлын тухай төлөвлөгөө баталлаа гэж Умард Атлантын эвслийн Ерөнхий нарийн бичгийн дарга Йенс Столтенберг Лондонд болсон дээд хэмжээний уулзалтын үр дүнгийн талаар мэдээллээ. “Хамгийн гол нь өнөөдөр бүхий л улс орнууд энэ төлөвлөгөөг зөвшөөрлөө. Энэ бол бид урагшаа алхаж, шийдвэр гаргаж  амжилтад хүрэх чадвартай гэдгийг харууллаа” гэж Столтенберг тэмдэглэснийг ТАСС агентлаг дамжуулсан байна.
 Турк улс ч Польш болон Балти орчмын улсуудыг хамгаалах төлөвлөгөөг хүлээн зөвшөөрлөө хэмээн Литовын Ерөнхийлөгчийн тамгын газар мэдээлжээ.
“Дээд хэмжээний уулзалтын үеэр баталсан НАТО-гийн энэ төлөвлөгөө Литвийн хувьд маш чухал ач холбогдолтой зүйл. Манай улсын Ерөнхийлөгчтэй уулзах үеэрээ Туркийн тэргүүн Тайип Эрдоган Балти орчмын болон Польшийг хамгаалах төлөвлөгөөг Турк улс дэмжиж байгаагаа илэрхийлж тохиролцсон” гэж энэ мэдээлэлд дурдсан байна. Туркийн Ерөнхийлөгч Эрдоганыг Литвийн Ерөнхийлөгчтэй уулзах үед Латвийн Ерөнхийлөгч Эгилс Левитс, Эстоний тэргүүн Керсти Кальюлайд, Эстоний Ерөнхий сайд Юри Ратас нар байлцжээ.
 Туркийн Ерөнхийлөгч Режеп Тайип Эрдоган үүний өмнө хэрэв Умард Атлантын эвсэл Туркт заналхийлж байгаа террорист байгууллагатай тэмцэхгүй юм бол Польш болон Балти орчмын орнуудыг хамгаалах тухай НАТО-гийн төлөвлөгөөг дэмжихээс татгалзаж байна гэж мэдэгдэж байсан юм. Турк улс НАТО-гийн холбоотнуудыг Балти орчмын улсуудын аюулгүй байдалд санаа тавьж байгаа атлаа курдуудын зүгээс туркт заналхийлж байгаа аюулыг үл тоомсорлож байна хэмээн буруутгаж байсан юм хэмээн eadaily.com хэвлэл мэдээлж байсан юм.
 НАТО-гийн гишүүн орнуудын дээд хэмжээний уулзалтаар бас Орос болон олон улсын терроризмын “түрэмгий үйл ажиллагаа” нэгдэж байна хэмээн мэдэгджээ. Мөн НАТО-гийн үйл ажиллагааг сансрын орон зайд өргөжүүлэх талаарх шийдвэр баталсан байна.