“Украины ахмад дайчдын хөдөлгөөн”-ий идэвхтнүүд, Францад амьдарч байгаа иргэдийн төлөөлөлтэй хамтран “Нормандын дөрвөл”-ийн хэлэлцээр дэх Украины байр суурийг дэмжиж Парист цуглаан зохион байгууллаа гэж зохион байгуулагчид фейсбүүк хуудсандаа мэдээлсэн байна. Цуглаанд оролцсон 150 гаруй хүн Бандерийн туг далбаа, Оросын эсрэг уриа лоозон барин жагсч төлөөллүүд нь үг хэлжээ. Зохион байгуулагчдын хэлж байгаагаар бол цуглаан руу хүмүүс өндөг шидэлсэн ч украинчуудын жагсаалын уур амьсгалыг өөрчлөөгүй гэнэ.
 Францад өчигдөр Донбассын сөргөлдөөнийг зохицуулах Орос, Герман, Франц, Украины тэргүүнүүд оролцсон “Нормандын формат”-ын дээд хэмжээний уулзалт эхэлсэн. Харин Украины сөрөг хүчин, үндэсний үзэлтнүүд хэдэн хоногийн өмнөөс л улсаараа “бууж өгөхгүйн” тулд хүмүүсийг гудамжинд гарч жагсахыг уриалсаар байгаа юм. Украины нийслэл Киевт бас “Зе-гийн төлөө улаан шугам” уриатай цуглаан болсон.
 Цуглаанд оролцогсод Украины газар нутгийн бүрэн бүтэн байдал, улс орноо Европын холбоо, НАТО-д элсүүлэх, “Крымыг эргүүлэн авах” асуудлаар буулт хийхгүй байхыг Засгийн газраасаа шаардсан байна. Мөн Донбасст сонгууль явуулахгүй байх, Оросын хил дээр хяналт тогтоохыг уриалж байжээ.