Беларусын Ерөнхийлөгч Александр Лукашенко, ОХУ-ын тэргүүн Владимир Путинтай уулзах өдөр Оростой нэгдэхийг эсэргүүцсэн Беларусын сөрөг хүчнийхэн Минскийн төвд “амьд гинжин хэлхээ” үүсгэн эсэргүүцлээ илэрхийлсэн байна. Эрх баригчид ийм жагсаал зохион байгуулахыг зөвшөөрөөгүй байна хэмээн Euroradio хэвлэлд бичжээ. Нийслэлийн Октябрийн талбайд хэдэн зуун хүн цугларсныг цагдаа нар тараахаар оролдсон ч жагсагчид эсэргүүцэл үзүүлжээ.
 Ордны талбайд болсон жагсаалын үеэр сөрөг хүчний удирдагч Павел Северинец, Владимир Некляев, Юрась Губаревич нар үг хэлсэн байна. П.Северинец бүр эсэргүүцлийн жагсаал “харанхуй болтол” үргэлжилнэ гэжээ. Тусгаар тогтнолын өргөн чөлөөнд 200 гаруй хүн “амьд гинжин хэлхээ” үүсгэж эсэргүүцлээ илэрхийлжээ.
 Беларусын Ерөнхийлөгч Александр Лукашенко Сочид ОХУ-ын Ерөнхийлөгч Владимир Путинтай уулзаж хоёр орныг интеграцчилах явцыг гүнзгийрүүлэх асуудал хэлэлцэх юм. Энэ хүрээнд хоёр орны тэргүүн хөдөө аж ахуй, аж үйлдвэрийн салбарт илүү их идэвхтэй хамтран ажиллах талаар ярина, интеграцчилах явцыг зөвхөн эдийн засгийн салбараар хязгаарлах юм гэж Беларусын Гадаад хэргийн сайд Владимир Макей мэдэгдсэн байна.