Ардчилагчдын хянаж байгаа АНУ-ын Конгрессын Төлөөлөгчдийн танхим Ерөнхийлөгч Дональд Трампыг эгүүлэн татах асуудлыг ойрын үед авч үзэх үйл явцыг эхлүүлж магадгүй байна гэж тус танхимын хууль зүйн хорооны дарга Жеррольд Надлер мэдэгджээ. Тэр Роберт Мюллерийг “Оросын асуудлаас” болж тусгай прокурораас огцруулсны дараа ингэж мэдэгдсэн байна.
Ж.Надлер Ерөнхийлөгчийг олон тооны гэмт хэрэгт буруутгасны дотор Конгрессыг мэхэлж, хууль зөрчихийг уриалж байсан гэжээ. “Ер нь хэн ч, Ерөнхийлөгч ч хуулиас дээгүүр байдаггүй юм” гэж хорооны дарга онцолсон байна. Ерөнхийлөгчийг эгүүлэн татах үйл явцыг бүгд найрамдахчууд олонх болсон Сенат батлах ёстой.

АНУ-ын Ерөнхийлөгч Дональд Трамп үүнээс өмнө Р.Мюллерийг хоёр жилийн хугацаанд Оростой ямар нэг яриа тохироо хийсэн талаар баримт нотолгоо олоогүйнх нь төлөө баяр хүргэж байсан юм. Тусгай прокурор Р.Мюллер 2016 оны Ерөнхийлөгчийн сонгуулийн үеэр АНУ-д гаднаас нөлөөлөх гэсэн олон тооны оролдлого гарч байсан гэж мэдэгдсэн ч үүнийгээ Д.Трампын багийнханд нялзааж шууд нэрлээгүй өнгөрсөн юм.
Роберт Мюллер 2016 оны Ерөнхийлөгчийн сонгуульд оросууд хөндлөнгөөс оролцож нөлөөлсөн эсэхийг мөрдөн шалгаж дууссанаа зарлаад албан тушаалаасаа огцорч байгаагаа лхагва гарагт мэдэгдсэн. Энэ шийдвэрийг зөвхөн өөрөө л гаргаж байгаагаас биш хэн нэгэн хүсч, албадаагүй гэж тэр бас хэлсэн байна.