АНУ-ын Сенатын Олон улсын хороо Оросыг терроризмыг санхүүжүүлэгч гэж зарлах эсэхийг Төрийн нарийн бичгийн дарга шийдэж байх хуулийн төслийг баталлаа гэж тус хорооны хэвлэлийн алба мэдээлснийг РИА Новости агентлаг дамжууллаа. Терроризмыг дэмждэг орны тоонд үүнээс гадна Иран, Умард Солонгос, Сири, Судан улсыг оруулсан байна. Үүний өмнө энэ жагсаалтад Куба, Ирак, Ливи, Өмнөд Йемен улсууд багтаж байсан юм. Үүнээс гадна тус хороо АНУ-ыг конгрессын зөвшөөрөлгүйгээр НАТО-гоос гаргах үйл явц эхлүүлэх Ерөнхийлөгч Дональд Трампын эрхийг хасах тогтоол баталжээ.
 Оросын тухай энэ баримт бичгийг конгрессын хороо баталснаас хойш 90 хоногийн хугацаанд Төрийн департаментын тэргүүнд өгөх юм байна. Энэ хугацааг Украины Донецкийн болон Луганскийн бүгд найрамдах улс дахь “гадаадын терроорист байгууллага” гэж байгаа зэвсэгт бүлэглэлийг Орос үнэхээр хянаж байгаа эсэхийг тодорхойлоход зориулан тогтоосон юм байна.
Үүний өмнө АНУ-ын Төрийн нарийн бичгийн даргын орлогч Дэвид Хэйл “Оросыг терроризмыг ивээн тэтгэгч гэж Төрийн департамент үзэхгүй байгаа” гэж мэдэгдсэн юм. Түүнийхээр бол Орос улс өөрөө террорист халдлагын золиос болж байгаа орон гэнэ.
 ОХУ-ын Төрийн Думын батлан хамгаалах хорооны даргын орлогч Александр Шерин энэ тухайд Вашингтоны хуулийн энэ төслийн эсрэг адил хуулийн төсөл боловсруулна гэж РИА Новости агентлагт ярьсан байна. Тэрээр Орост террорист бүлэглэлийг дэмжих ямар нэг шалтгаан байхгүй, харин энэ асуудал АНУ-д бол байгаа гэжээ. “Ямар ч террорист бүлэглэл өнөөдөр дэлхий дээр дэмжлэггүйгээр оршин тогтнох аргагүй, ийм нөөц боломж зөвхөн АНУ-д л бий” гэж тэр хэлсэн байна.