НАСАУ энэ сарын 13-нд Сохэ дэх сансрын буудлаас “маш чухал шинэ туршилт” хийлээ гэж Умард Солонгосын мэдээллийн төв агентлаг мэдээллээ. Туршилтыг тус улсын Батлан хамгаалах шинжлэх ухааны академи явуулсан гэснээс өөр тодорхой зүйл мэдээлээгүй байна. “Манай батлан хамгаалахын шинжлэх ухааны эрдэмтэд асар их амжилтад хүрсэнд намын төв хорооноос баяр хүргэлээ. Батлан хамгаалах салбарт сүүлийн үед ар араасаа гарч байгаа ололт амжилт нь БНАСАУ-ын цөмийн стратегийн чадавхыг найдвартай түвшинд бас нэг алхам урагшлууллаа” гэж академийн хэвлэлийн албаны мэдэгдэлд дурдсаныг РИА Новости агентлаг орчуулан мэдээлжээ.
Үүний өмнө Умард Солонгосын мэдээллийн төв агентлаг Сохэд арванхоёрдугаар сарын 8-нд “маш чухал туршилт” хийсэн талаар мэдээлж байсан. Тэгэхэд энэ туршилтын амжилт нь “БНАСАУ-ын стратегийн статусыг өөрчлөхөд маш чухал нөлөө үзүүлэх болно” гэж байсан юм. Умард Солонгосын удирдагч Ким Чен Ун 2018 онд итгэлцэл бэхжүүлэх арга хэмжээний хүрээнд Сохэ дэх туршилтын талбайгаа хаана гэж байсан. 2018 оны наймдугаар сард туршилтын тус талбайг шинэчлэх ажлыг зогсоосон ч 2019 оны гуравдугаар сард пуужин хөөргөх талбайд сэргээн босгох ажил хийж эхэллээ гэж Америкийн Жонс Хопкинсийн нэрэмжит их сургуулийн мэргэжилтнүүд мэдэгдсэн.
Харин өнгөрсөн долоо хоногт НҮБ-ын дэргэдэх БНАСАУ-ын Элчин сайд Ким Сонг цөмийн зэвсэггүй болох асуудал үүнээс хойш АНУ-тай хэлэлцээр хийх хэрэгсэл болохгүй гэж мэдэгдсэн. АНУ-ын Ерөнхийлөгч Дональд Трамп хариуд нь ийм нөхөрсөг биш мэдэгдэлд гайхаж байгаагаа мэдэгдсэн байна.