Орос, Европын холбоо шиг томоохон хөршүүд ашиг сонирхлынхоо үүднээс харилцаагаа сайжруулах арга заавал олох ёстой гэж Европын холбооноос ОХУ-д суугаа Элчин сайд Маркус Эдерер “Известия” сонинд ярилцлага өгөхдөө тэмдэглэсэн байна. Түүнийхээр бол Москва, Брюсселийн харилцаа хурцадмал байгаа хэдий ч талууд нөхцөл байдлыг сайжруулахын тулд хичээх, ийм тохиолдолд зарим болзлыг нь биелүүлэх боломжтой гэжээ.
“Хэдийгээр эхлэхэд эрт байгаа ч 2020 онд нөхцөл байдлыг сайжруулах бодит төлөв байгааг бид харж байна. Бид Орос-Украины харилцаанд дэвшил гарч байгааг тэмдэглэж байна, энэ нь Орос болон Европын харилцаанд маш чухал. Та нар Европын холбооноос ОХУ-ын талаар баримтлах бодлогын таван зарчмыг харж байгаа бол хамгийн чухал нь “Минскийн хэлэлцээрийг бүрэн биелүүлэх явдал” гэж дипломат хэлсэн байна.
Минскийн хэлэлцээрийг биелүүлэх, байгалийн хийн асуудлыг шийдэх нь ОХУ, Европын холбооны харилцааг сайжруулах гол түлхүүр болно гэжээ. Өнгөрсөн 30 жилд Европын холбоо, Оросын харилцаанд “дэвшил, уналт” олон байсан ч одоо талууд харилцаагаа цаашид хөгжүүлэхийг хичээх ёстой гэсэн байна.
Үүнээс гадна оросын иргэд шенгений виз авах талаараа хятадын иргэдээс давж байгааг дипломат тэмдэглээд энэ хүрээнд Европын холбоо, Оросын хамтын ажиллагаа амжилттай хөгжиж байгааг онцолжээ.