АНУ-ын Конгрессын сенат, Османы эзэнт гүрэн 1915 онд арменчуудыг хоморголон хядсан гэсэн тогтоол гаргасны хариуд Туркийн парламент Америкийн колончлох үедээ индианчуудыг хоморголон хядсан гэсэн тогтоол гаргана гэж Туркийн Ерөнхийлөгч Режеп Тайип Эрдоган мэдэгдсэн байна. Османчууд арменуудыг хоморголон хядсаныг дурсах болон, албан ёсоор хүлээн зөвшөөрөх тухай тогтоолыг АНУ-ын Конгрессын сенат өнгөрөгч долоо хоногийн пүрэв гарагт баталсан юм. Энэ тогтоол нь парламентын дээд танхим арменчуудыг хоморголон хядсаныг эргэн дурсч, албан ёсоор хүлээн зөвшөөрч байгааг илэрхийлэхийн зэрэгцээ дахин ийм хядлага явуулахгүй байх, энэ талаарх сурталчилгааг хийж байхыг уриалахад чиглэсэн юм.
 Туркийн Гадаад хэргийн яам энэ тогтоолыг харин шүүн хэлэлцэж байна. “Бид 1915 оны үйл явдлын талаар сая сая баримт бичгийг ил тод дэлгэсэн. Ирээд үз, судал. Бид гар дээр бэлэн байгаа баримтуудын тухай ярьж байна. Бид одоо та нарын эсрэг, манай парламентын яг ийм шийдвэрээр хариу барих хэрэгтэй юм байна. Бид үүнийг хийх болно. Америкийн тухай, индианчуудын тухай дуугүй өнгөрч болох уу. Энэ бол АНУ-ын түүхийн гутамшигт хуудас” гэж Р.Эрдоган телевизийн A Haber сувгаар ярихдаа дурджээ.
 XIX зууны эцэс ХХ зууны эхээр Османы эзэнт гүрэн арменчуудыг хавчин гадуурхаж, мөрдөн мөшгөж эхэлсэн нь 1915 онд дээд цэгтээ тулсан юм. Османы эзэнт гүрний энэ хядлагыг хүлээн зөвшөөрөхийг арменчууд ч дэлхий дахинд уриалдаг. Туркууд харин уламжлал ёсоор энэ буруутгалыг няцааж 1915 оны эмгэнэлт явдлын золиос нь зөвхөн арменчууд ч биш, бас туркууд хэлмэгдсэн гэж тайлбарладаг юм. Османы эзэнт гүрний 1915 оны энэ хядлагыг хоморголон хядлага байсан гэж олон улс хүлээн зөвшөөрөх эсэх нь Турк, Армен улсуудын харилцааны нэг тулгамдсан асуудал болсоор ирсэн юм. Турк бас Дэлхийн нэгдүгээр дайн үйл явдлын талаарх түүхэн баримтуудыг судалж бодит үнэнийг тогтоох түүхчдээс бүрдсэн олон улсын комисс байгуулахыг уриалдаг юм.