АНУ террорист бүлэглэлүүдтэй хамтарч, Сирийн нефтийг Туркт зарж байна гэж Сирийн Ерөнхийлөгч Башар Асад “Феникс” телевизэд өгсөн ярилцлагадаа тэмдэглэснийг төрийн мэдээллийн SANA агентлаг нийтэлжээ. Сирийн Ерөнхийлөгчийн хэлснээр бол Турк улс террорист бүлэглэлүүдтэй хамтран нефть хулгайлан худалдаж байгаа гэнэ. “Туркийн дэглэм нефть худалдахад гол үүрэг гүйцэтгэж байна. Эхлээд тэд “Жебхат ан-Нусра” зэвсэгт бүлэглэлтэй хамтарч байсан бол дараа нь “Лалын улс”-тай, одоо америкчуудтай хамтран үүнийг хийж байна” гэж Б.Асад мэдэгджээ.
 Башар Асад бас Сирийн газар нутагт америкчуудын оролцоо огт байхгүй гээд “Хэрэв тэд энд үлдэх юм бол ард түмний эсэргүүцэлтэй тулгарна. Эцсийн эцэст тэд явах болно” гэсэн байна. Террористуудтай дайтаж эхлэхэд л Сирийн Засгийн газар нефтийн орд газруудынхаа хяналтыг алдаж нефтийн орлого бараг тэг болсон гэж Б.Асад нэмж хэлжээ. Одоо нефтийн цооногууд ажиллаж Сирийн эдийн засагт хувь нэмрээ оруулж эхэлсэн ч энэ хангалтгүй байна, яагаад гэвэл орд газрууд АНУ-ын болон, террорист бүлэглэлүүдийн мэдэлд байсаар байгаа юм.
 Сири улсыг курдуудтэй хэлэлцээр хийхэд Вашингтон саад хийхийг оролдсоор байна гэж Башар Асад арванхоёрдугаар сарын 15-нд мэдэгдэж байсан юм. Түүнийхээр бол АНУ Сирийн Засгийн газартай тохиролцохгүйн тулд курдийн зэвсэгт бүлэглэлүүдэд шахалт үзүүлж байгаа гэжээ.