Агаарын хөлөг үйлдвэрлэгч Boeing компани “Boeing 737 MAX” онгоц үйлдвэрлэхээ ирэх 2020 оны нэгдүгээр сараас түр хугацаагаар зогсооно гэж даваа гарагт тараасан мэдэгдэлдээ өгүүлжээ. Энд дурдсанаар бол компани “Ирэх сараас үйлдвэрлэлээ зогсооно” гээд хамгийн гол нь нөөцөд байгаа 400 ширхэг Boeing 737 MAX онгоцоо хэрэглэгчдэд хүргэхэд анхаарах юм байна. Гэхдээ энэ шийдвэртэй холбогдуулан ажилтнуудаа бөөнөөр нь халахгүй гэдгээ Boeing онцолжээ.
 Boeing ирэх оны нэгдүгээр сараас 737 MAX онгоцны үйлдвэрлэлээ зогсоох гэж байна хэмээн The Wall Street Journal сонин үүний өмнө мэдээлж байсан юм. Эх сурвалжийн хэлснээр бол тус компани сүүлийн үед сар тутам ийм төрлийн 40 онгоц үйлдвэрлэж байжээ.
 Хоёр ч том осол гарсны дараагаар Boeing 737 MAX онгоц угсрахыг зогсоосон юм. Энэ 2019 оны гуравдугаар сарын 10-нд Эфиопийн агаарын тээврийн Ethiopian Airlines компанийн Boeing 737 MAX 8 онгоц сүйрч 157 хүн амь эрсэдсэн бол 2018 оны аравдугаар сарын 29-нд агаарын тээврийн Lion Air компанийн яг ийм онгоц Индонезид осолдож 189 хүн амь үрэгдсэн юм.
Энэ хоёр онгоцны осол нь агаарын хөлгийн маневрлах чадварын системд алдаа гарсан гэдгийг Boeing компанийн удирдлага хүлээн зөвшөөрсөн байна. Үүний дараа Орос, АНУ болон Европын холбооны улсууд, өөр олон орон аюулгүй байдлын үүднээс Boeing 737 MAX 8 онгоцыг агаарын тээвэрт ашиглахаа зогсоосон юм.