Боливын прокурорын газар энэ сарын 18-ны лхагва гарагт тус улсын экс-ерөнхийлөгч Эво Моралесыг баривчлах зөвшөөрөл гаргасныг Боливын Дотоод хэргийн сайд Артуро Мурильо твиттер хуудсандаа гэрэл зурагтай нь нийтэлсэн байна. Баривчлах зөвшөөрөлд Мора­лесын эсрэг эрүүгийн хэр­гийг мөрдөн шалгах ажиллагаа явуулсны дүнд ийм шийдвэр гаргалаа гэжээ.
Боливын түр засгийн газар түүнийг бослого, терроризм, терроризмыг санхүүжүүлсэн хэргүүдэд буруутгаж байгаа юм байна.
 Боливын төрийн тэргүүнээс огцорсныхоо дараа Мексикт улс төрийн орогнол хүсч гарсан ч одоо Аргентинд дүрвэгчийн байдлаар амьдарч байгаа Эво Моралес харин энэ шийдвэрийг хууль бус Үндсэн хууль зөрчсөн үйлдэл гэж үзэж байна.
“Манай хувьсгалын 14 жилийн ойгоор засгийн газраас би “ийм л мундаг бэлэг” авч байгаа нь шударга бус, хууль бус, Үндсэн хууль зөрчсөн хэрэг” гэж тэрээр өөрийнхөө Twitter хуудсанд бичжээ.
Моралес бас “Би Боливын тусгаар тогтнол, эрх чөлөөний төлөөх улс төр, үзэл суртлын тэмцлээ үргэлжлүүлэх болно” гэжээ.