Ирэх оны тавдугаар сард Москвад болох аугаа их Эх орны дайны ялалтын 75 жилийн ойд хүрэлцэн ирнэ үү гэсэн урилгад АНУ-ын Ерөнхийлөгч Дональд Трамп, Умард Солонгосын удирдагч Ким Чен Ун хоёр ирэх эсэх тухайгаа хариу өгөөгүй байна гэж ОХУ-ын ерөнхийлөгчийн туслах Дмитрий Песков мэдээлсэн байна.

 АНУ-ын Ерөнхийлөгчид илгээсэн урилгын хариу ирсэн үү гэсэн сэтгүүлчийн асуултад Песков “Д.Трампаас хариу ирээгүй байна” гэж хариулжээ. Умард Солонгосын удирдагч Ким Чен Унаас хариу ирсэн үү гэхэд Кремлийн төлөөлөгч мөн л “Бас л хариу алга байна, одоохондоо ирээгүй” гэсэн байна.
 “Уг нь бүгдэд урилга илгээсэн, заримаас нь хариу алга л байна. Гэхдээ одоо төлөөлөгчдийн түрүүч нь тодорхой болоод байгаа. Энэ бол маш чухал арга хэмжээ” гэж Д.Песков онцолжээ.
ОХУ-ын Ерөнхийлөгч Владимир Путин украины коллег Владимир Зеленскийтай Парист уулзах үеэрээ түүнийг их ялалтын ойд урьсан болов уу гэсэн асуултад Д.Песков тодорхой хариу өгөлгүйгээр энэ талаар тодорхой мэдээлэх болно гэсэн байна.
 Москвад болох Их ялалтын 75 жилийн ойд 17 улс орны төрийн тэргүүн ирж оролцохоо мэдэгдээд байгаа гэж ОХУ-ын Ерөнхийлөгчийн туслах Юрий Ушаков үүний өмнө мэдээлж байсан юм.