Ливийн үндэсний зөвшлийн Засгийн газар Туркт хандаж албан ёсоор цэргийн тусламж, дэмжлэг хүслээ гэж Reuters агентлаг дамжууллаа. Хэвлэлд мэдээлснээр Ливийн үндэсний зөвшлийн Засгийн газар Анкарагаас “агаар газар, тэнгисийн” цэргийн дэмжлэг хүссэн гэнэ. Туркийн Ерөнхийлөгч Режеп Тайип Эрдоган туркийн зэвсэгт хүчнийг Ливид оруулах асуудлыг 2020 оны нэгдүгээр сард парламентад оруулна гэж үүний өмнө мэдэгдэж байсан юм.
 Ливид өнөөдөр янз бүрийн удирдагч бүхий талуудын хооронд зэвсэгт мөргөлдөөн болсоор байгаа юм. Ерөнхий сайд Файез Саражийн тэргүүлсэн үндэсний эвслийн Засгийн газар улс орноо удирдаж байгаа бол Абдалла Абдуррахман ат-Тани тэргүүтэй “дорнын засгийн газар” гэж бас байгаа юм. Энэ дорнын Засгийн газрыг Ливийн үндэсний армийн командлагч Халиф Хафтар дэмжиж байгаа юм.