Орос, Иран, БНХАУ-ын тэнгисийн цэргийн хамтарсан манер, сургуулилт Энэтхэгийн далайн хойд хэсэг Оманы буланд өнгөрөгч баасан гарагт эхэллээ гэж Ираны тэнгисийн цэргийн хүчин мэдээлжээ.
Энэ хамтарсан сургуулилт “энхтайван, найрамдал, аюулгүй байдлын тогтвортой байдал”-ын илэрхийлэл гэж Ираны тэнгисийн цэргийн хүчний төлөөлөгч Голямрез Тахани онцлон тэмдэглэсэн байна. Энэ сургуулилт Чабахар боомтоос Энэтхэгийн далайн хойд хэсэг хүртэл нийт 17 мянган хавтгай дөрвөлжин км нутагт болж байгаа юм байна. Иран улс ийм томоохон сургуулилтыг 1979 оноос хойш анх удаагаа хийж байгаа хэмээн Ираны цэргийн төлөөлөгч мэдэгджээ. “Далайн аюулгүй бүс” хэмээн нэрлэсэн гурван улсын хамтарсан энэ сургуулилт тухайн бүс нутагт аюулгүй байдлыг сахиулах, терроризм, далайн дээрмийн эсрэг ажиллагааны талаар сургууль дадлага хийх юм байна.