АНУ-ын Кино шүүмжлэгчдийн үндэсний нийгэмлэг (National Society of Film Critics, NSFC) 2019 оны шилдэг киногоор Өмнөд Солонгосын найруулагч Пон Жун Хогийн “Паразит” киног 2019 оны шилдэг кино гэж нэрлэснийг Америкийн кино шинжээч шилдгүүдийг эгнээндээ нэгтгэдэг тус байгууллагын албан ёсны сайтад ням гарагт мэдээлжээ. Уг кинонд Өмнөд Солонгосын нийгмийн хоёр өөр давхаргын хоёр гэр бүлийн тухай өгүүлдэг ба нэг нь шударга бус аргаар хангалуун сайхан амьдардаг бол нөгөө нь өөрийнхөө боломж бололцоогоор л амьдардаг айлын тухай өгүүлнэ. Энэ киног шилдэг хэмээн Америкийн кино шүүмжлэгчдийн нийгэмлэгийн 44 шинжээч санал нэгдсэний зэрэгцээ “Шилдэг зохиол”-оор мөн нэрлэжээ.

 “Паразит” кинотой Америкийн найруулагч Квентин Тарантиногийн “Холливудад нэг удаа”, найруулагч Грета Гервигийн “Жижигхэн эмэгтэй” кинонууд өрсөлджээ. Найруулагч Грета Гервиг харин “Шилдэг найруулагч”-ийн шагнал хүртсэн байна.

 “Шилдэг жүжигчин” шагналаар Испанийн найруулагч Педро Альмодоварын “Өвдөлт, алдар гавьяа” хэмээх киноны гол дүрд тоглосон жүжигчин Антонио Бандерас тодорсон бол “Шилдэг эмэгтэй жүжигчин”-ээр найруулагч Кент Жонсын “Диана” кинонд тоглосон Мэри Кей Плейс шалгарсан байна.
Америкийн хэвлэлүүдэд киноны талаар байнга бичдэг киноны шилдэг 60 шинжээч, судлаачийг нэгтгэсэн Америкийн кино шүүмжлэгчдийн нийгэмлэг анх 1966 онд Нью-Йорк хотноо байгуулагдсан юм.