Венесуэлийн сөрөг хүчний удирдагч Хуан Гуайдог тус улсын парламент Үндэсний ассамблейн даргын үүрэгт ажлаас чөлөөлж, парламентын спикерээр Ерөнхийлөгч Николас Мадурог дэмждэг депутат Луис Парраг томиллоо гэж орон нутгийн хэвлэлүүд мэдээлснийг РИА Новости агентлаг дамжууллаа. Парламентын өмнөх удирдлага түүнийг огцруулах энэ хуралдаанд оролцоогүй байна. Х.Гуайдогийн талынхан хуралдааныг тасалдуулахыг оролдож, танхим дундуур яван санал хураалтыг өөрчлөхийг шаардаж байжээ. Энэ үеэр хүчнийхэн парламентын барилгыг бүслэн, сөрөг хүчний зарим депутатыг дотогш нэвтрүүлэхгүй байсан гэж спикер асан Хуан Гуайдо ярьсан байна.

 Өнгөрөгч 2019 оны нэгдүгээр сарын сүүлчээс Венесуэлийн улс төрийн нөхцөл байдал эрс хурцадсан. Улс орон даяар өрнөсөн эсэргүүцлийн хөдөлгөөний далбаан дор парламентын спикер Хуан Гуайдо өөрийгөө Венесуэлийн түр цагийн ерөнхийлөгч хэмээн өргөмжилсөн. АНУ болон Латин америкийн орнууд түүнийг улсын ерөнхийлөгч хэмээн хүлээн зөвшөөрч байгаа бол Орос, Хятад, Куба зэрэг улс орнууд үүрэг гүйцэтгэж байгаа Николас Мадурог хууль ёсны ерөнхийлөгч хэмээн дэмжиж байгаа юм.