Кени дэх АНУ-ын цэргийн бааз руу “Аль-Шабаб” зэвсэгт бүлэглэлийн дайчид довтолсны улмаас цэргийн нэг албан хаагч, Пентагоны гэрээт хоёр ажилтан амь үрэгдэж, америкийн цэргийн хоёр албан хаагч шархадлаа хэмээн нэгдүгээр сарын 5-нд АНУ-ын Африк дахь командлалын хэвлэлийн алба мэдээллээ.

 Энэ үйл явдал Америкийн цэргүүдтэй хамтардаг Кенийн зэвсэгт хүчний цэргийн бааз байрладаг Мэнда-бэй нисэх буудлын районд болсон байна. Буудлагын зэвсэг бүхий дайрагчид цэргийн баазын байрлалд нэвтрэн нисэх буудалд байсан иргэний зургаан онгоцыг гэмтээжээ. Америк, Кенийн цэргийнхэн хамтраад дайралтыг няцаасан ч зэвсэгт дайчдаас хэчнээн хүн устгаснаа мэдээлээгүй байна.

 “Аль-Шабаб”-ын зэвсэгт дайчид 2017 онд бас Сомалийн өмнөд нутагт байдаг цэргийн бааз руу довтолж дэлбэрэлт үйлдсэнээр Сомалийн 26 цэрэг амь үрэгдэж байсан. Исламын хэт даврагч залуу можахедуудын хөдөлгөөн буюу “Аль-Шабаб” бүлэглэл нь Сомалид байрлаж, олон улсын алан хядагч “Аль-Каида” байгууллагатай нягт хамтран ажилладаг. Энэ бүлэглэлийн дайчид гол нь Сомалийн Засгийн газрын эсрэг тэмцэж НҮБ-ын хүмүүнлэгийн үйл ажиллагаанд саад учруулдаг байна.