АНУ агаараас цохилт өгч ираны гвардын хүчний хошууч генерал Касем Сулейманы амийг хөнөөсний төлөө “Дональд Трампын толгойг” авчирсан хүнийг 80 сая ам.доллароор шагнахаар зарласан байна. Ингэхдээ энэ хөрөнгийг ард түмнээсээ, иран хүн бүрээс долларын хандив авч цуглуулах гэнэ.

 Ираны ард түмний хувьд К.Сулейманыг хөнөөсөн нь жинхэнэ гарз хохирол болж байна. К.Сулейман өөрийнхөө улс орон, ард түмэнд жинхэнэ үндэсний баатар, Тегеранаас гадаад улс орнуудад явуулдаг “цэргийн ажиллагаа, нууц ажлын уран барилгач”, Ираны хувьсгалт хүчин КУДС-ын толгойлогч генерал байжээ.

 Иранд К.Сулеймантай салах ёс гүйцэтгэх ёслолд хэдэн сая хүн оролцож энэ ажиллагааг хэд хэдэн телевиз шууд дамжуулсан байна. Касем Сулейманы цогцос бүхий авсыг даваа гарагт Тегераны гол сүм Муссалд байрлуулан салах ёслол үйлдсэн байна. Ийм ёслол Иранд шашны тэргүүнээс өөр хэний ч хойноос болж байгаагүй юм.

 Салах ёслолыг зохион байгуулагчид генералыг хөнөөх тушаал өгсөн “Д.Трампын толгой”-н төлөө иран хүн бүрээс нэг доллар цуглуулах санал гаргажээ. Улмаар тун удахгүй өшөө авна гэсэн байна. “Иран улс 80 сая хүн амтай. Ираны иргэн бүрээс нэг доллар цуглуулан, Д.Трампын толгойн төлөө шагнал босгох болно” гэж мэдэгдсэнийг хэд хэдэн телевиз шууд дамжуулжээ.
Оршуулгын ёслол дээр албан ёсны үг хэлсэн хүн бүр америкийн газар нутаг, бүр Цагаан ордон руу дайрна гэдгээ зарласан байна. “Энэ бол та нар шийдэхгүй юм бол та нар ялагдах дайн зарлаж байгаа хэрэг” гэж Ираны депутат Абольфазл Абутораби мэдэгдсэн байна.