Австралид өнгөрсөн зунаас эхэлсэн ой хээрийн түймэр унтрахгүй шатаж байгаа талбайн хэмжээ долоон сая га талбайд хүрч энэ нь Бельгийн газар нутгаас хоёр дахин даваад байна. Энэ сарын 6-ны байдлаар Шинэ Өмнөд Уэльс, Виктория, Өмнөд Австралийн нутагт нийтдээ түймрийн нийт 170 голомт асч байна гэж мэдээллээ. Түймэртэй тэмцэх зорилгоор Австралийн засгийн газар түүхэндээ хамгийн их буюу 3000 нөөцийн цэргийг дайчлан татаад байна. Нөөцийнхөн гал түймэрт өртсөн нутгуудад эрчим хүчний байгууламжуудыг сэргээх, хүнс, ус, шатахуун түгээх юм байна.

 Засгийн газар мөн түймэрт өртсөн нутгуудыг сэргээн босгоход зориулж 1.25 тэрбум евро гаргахаа зарлалаа. “Бидэнд хийх ажил их байна, энэ бүс нутгуудыг бид бүхий л бололцоогоор дэмжих болно” гэж Австралийн Ерөнхий сайд Скотт Моррисон мэдэгдсэн байна. Өнгөрөгч аравдугаар сараас хойш тус улсад түймрийн улмаас 24 хүн нас барж, 1500 орчим барилга байшин түймэрт өртөн шатаад байгаа юм. Нэгдүгээр сарын 6 гэхэд нийслэл Камберрад түймрийн утаа аюулын түвшинд хүрч эрх баригчид ард иргэдийг гэрээсээ гарахгүй байхыг анхааруулж байна. Дэлгүүр худалдааны төвүүд, музей, сургууль цэцэрлэгүүд ажиллахгүй байна.