Өнгөрсөн бямба гарагт Тайваньд Ерөнхийлөгчийн сонгууль боллоо. Хятадыг эсэргүүцэгч Ерөнхийлөгч Цай Ин Вень улиран сонгогдов. Тэрбээр сонгогчдын 57 хувийн саналаар ялалт байгуулсан байна. Энэ удаагийн Тайванийн ерөнхийлөгчийн сонгуульд 8.2 сая хүн санал өгч оролцсон нь түүхэн дээд амжилт байв.

 Цай Ин Вень сонгуульд ялсныхаа дараа хэлсэн үгэндээ “Тайваньчууд бид чөлөөт ардчилсан амьдралын хэв маяг, эх орноо хэрхэн нандигнадгийг дэлхий дахинд харууллаа. Тайванийг хүчээр буцаан авна гэдэг сүрдүүлгээ Бээжин зогсоох хэрэгтэй” хэмээн мэдэгджээ. Харин бусад нэр дэвшигчдийн хувьд Хятадтай ойр харилцаатай байж, эдийн засгийн ашиг олно гэсэн байр суурийг илэрхийлжээ. Цай Инг Вен Тайванийг БНХАУ-аас тусгаар байлгахыг хүсдэг улстөрч.

 БНХАУ Тайванийг өөрийнх нь нэг хэсэг гэж үздэг бөгөөд “нэг улс-хоёр систем” бодлогыг тулгадаг. Ерөнхийлөгчийн бүрэн эрхийн хугацаа дуусахад ойртох үеэр Цай Ин Вений нэр хүнд унасан байсан ч Хонконгт Бээжинг эсэргүүцэх хөдөлгөөн идэвхжсэнээр рейтинг нь дахин өссөн байна.
Цай Ин Вений гол өрсөлдөгч Гаосюн хотын захирагч, 62 настай Хань Гоюй сонгогчдын 38.6 хувийн санал авчээ. Түүний нам Бээжинтэй харилцаагаа сайжруулахыг дэмждэг. Өнгөрсөн баасан гарагт Тайваньд мөн орон нутгийн парламентын сонгууль явагдав. Парламентын сонгуулийн үр дүн хараахан гараагүй байна.