Умард Солонгос тавдугаар сарын 10-нд пуужин харваж туршсанаас хойш БНАСАУ-ын удирдагч Ким Чен Ун анх удаагаа олон нийтийн өмнө гарч Чагандо мужийн хотуудад хэд хэдэн байгууллага, нийгмийн байгууламжид зочиллоо гэж Солонгосын цахилгаан мэдээний агентлаг мэдээллээ. Энэ үеэрээ умардын удирдагч Канге хотын тракторын завод, ган үйлдвэрлэлийн завод, пионер сурагчдын ордонд очсон байна. БНАСАУ-ын удирдагч саяхан барьж дуусгасан пионер сурагчдын ордны барилгыг үзээд сэтгэл дундуур байгаагаа илэрхийлж барилгын ажлыг “халтуурдсан” байна, ашиглах аргагүй байна гэж мэдэгджээ.

Ким Чен Ун бас Канге, Манпхо хотуудад орон сууцны хороолол барих төлөвлөгөөтэй танилцахдаа барилгын ажил их хариуцлагагүй, эмх замбараагүй явж байна гэж шүүмжилжээ. Тэр бас Канге хотын ногоон байгууламжийг сайжруулах ажил хангалтгүй байгааг тэмдэглэсэн байна. Эцэст нь Ким Чен Ун барилга байгууламжийн шинэ төлөвлөгөө гаргахыг даалгажээ.