АНУ-ын Ерөнхийлөгч Дональд Трамп Apple компанид хандаж гэмт хэрэгтнүүдийн хэрэглэж байгаа утсыг хаах санал тавьсан байна. Тэгэхдээ тэр компани худалдааны асуудлаар ямагт Засгийн газрын дэмжлэг хүлээж байсан, одоо төр засагтаа туслах болсон гэжээ. “Бид бүхий л цаг үед худалдааны болон бусад асуудлаар Apple компанид тусалж ирсэн, гэтэл тэд алуурчид, хар тамхины наймаачид, бусад гэмт хэргийн элементүүдийн хэрэглэж байгаа утсыг блоклохоос татгалзаж байх юм” гэж Д.Трамп Twitter-тээ бичжээ.
Үүний өмнө АНУ-ын Ерөнхий прокурор Уильям Барр бас Флоридад цэргийн бааз руу дайрсан алан хядагчдын гар утсыг блоколж тусламж үзүүлээч гэсэн хүсэлтээс Apple компани татгалзлаа хэмээн буруутгаж байсан юм. Мөрдөн шалгах ажиллагаанд хамтран ажиллахаас татгалзлаа гэж У.Барр мэдэгдсэн. Ерөнхий прокурорын туслахуудын хэлснийг The New York Post сонинд мэдээлснээр бол Apple мөрдөн байцаагчдад зэвсэгт дайчидтай холбоотой маш бүрхэг мэдээлэл өгсөн гэнэ. Өнгөрөгч 2019 оны арванхоёрдугаар сарын 6-нд Саудын Арабын цэргийн албан хаагч Мухаммед аш-Шамрани хамт алба хаадаг усан цэргүүд рүү гал нээж дөрвөн хүний амь хөнөөн найман цэргийг шархдуулсан. Гэмт этгээд өөрөө алагджээ.
Үүнээс үүдээд Пентагон АНУ-д байгаа Саудын Арабын 850 орчим цэргийнхнийг шалгахаар шийдсэн. Мөн Саудын Арабаас АНУ-д бэлтгэл хийж байсан хэдэн арван цэргийн албан хаагчийг эх оронд нь буцаасан аж.