Хятадын эрх баригчид үл мэдэгдэх шинэ төрлийн коронавирусийн халдварыг 60 хүрэхгүй хүн авсан гэж мэдээлж байгаа ч Лондоны эзэн хааны коллежийн Халдварт өвчин судлалын төвийн эрдэмтэд бодитой авч үзвэл энэ тоо 1700-д ойртож байгаа гэж байна. Халдвар Хятадын Ухань хотод ихэвчлэн тархаад байгаа нь шинжээчдийнхээр бол агаарын тээврээр зорчигчдын урсгалтай холбоотой гэж үзэж байна. Ухань хот 19 сая хүн амтай, олон улсын нисэх буудлаар нь өдөрт гадаадын 3-4 мянган хүн зорчин үйлчлүүлдэг аж.
Мэргэжилтнүүд бас хүн вирусийн халдвар авсан тэр дороо өвчлөхгүй, 5-6 хоногийн дараа л шинж тэмдэг нь мэдэгдэнэ гэсэн байна. Хятадын эрх баригчид энэ вирусийн халдвар авсан хүн 59 боллоо гэж энэ сарын 5-нд мэдэгдсэн. Үүнээс гадна тус улсаас гадна Тайландад хоёр, Японд нэг хүн өвчилснийг мэдээлж байгаа. Халдвар тархалтын судалгаанаас үзэхэд өвчний тархалт нь Уханийн далайн бүтээгдэхүүний бөөний захтай холбоотой гэж байна.
“Ухань гурван ч тохиолдлоор уг өвчнийг бусад орон руу гаргаж байгаа, халдвар тэдний мэдээлж байгаагаас илүү олон бий” гэж халдвар судлаач профессор Нил Фергюсен ВВС агентлагт мэдэгдсэн байна. Түүнийхээр бол “Сандралд ороход эрт байна”, гэхдээ тайван байж болохгүй гэнэ. Үл мэдэгдэх вирусийн халдвар Хубэй мужийн нийслэл Уханьд өнгөрөгч оны арванхоёрдугаар сарын сүүлчээр илэрсэн. Тэнд Хятадын Эрүүл мэндийн улсын хорооны мэргэжилтнүүд ажиллаж байгаа юм. Уг халдварын улмаас өнөөдрийн байдлаар хоёр хүн нас бараад байгааг эрх баригчид мэдээлж байна.
Уг өвчинтэй холбоотойгоор Хонконг, Сингапур, АНУ-ын Сан-Франциско, Лос-Анжелес, Нью-Йоркийн олон улсын нисэх буудлууд урьдчилан сэргийлэх арга хэмжээ авч байна.