Фельдмаршал Халиф Хафтарын удирдсан Ливийн үндэсний арми давшилтаа үргэлжлүүлсээр байвал энгийн номхон ард иргэдээ хамгаалахын тулд НҮБ-д хандаж олон улсын цэргийн хүч ирүүлнэ гэж нийслэлд эрх барьж байгаа Үндэсний зөвшилцлийн Засгийн газрын тэргүүн Фаиз Сарраж мэдэгджээ. “Х.Хафтар давшилтаа зогсоохгүй бол Ливийн энгийн номхон ард иргэдийг хамгаалахын тулд олон улсын хамтын нийгэмлэг арга хэмжээ авч, олон улсын хүч оруулах болно” гэж Ф.Сарражийн хэлснийг ТАСС агентлаг эш татжээ.
“Ийм хүч НҮБ-ын шийдвэрээр ажиллах ёстой. Дараа нь мэргэжилтнүүд, үүнд хэн, тухайлбал, Европын холбоо, Африкийн холбоо, Арабын улсуудын лиг оролцох эсэхийг шийднэ” гэж Ливийн үндэсний зөвшилцлийн Засгийн газрын тэргүүн Германы Welt am Sonntag хэвлэлд ярилцлага өгөхдөө дурдсан байна. Ливийн хямралыг зохицуулахад Европын холбоо маш ойлгомжгүй хандаж байгаа гэж Ф.Сарраж хэлжээ. “Европын холбоог Х.Хафтарын давшилтын эсрэг арга хэмжээ авч, Ливийн өнөөгийн хямралыг эцэс болгоход тусална гэж бид хүлээж байсан. Европчууд харьцангуй орой ирлээ” гэж Ф.Сарраж мэдэгдсэн байна.
Германы нийслэлд Орос, Алжир, Их Британи, Египет, Арабын нэгдсэн Эмират, Хятад, АНУ, Турк, Франц улсууд болон Ливийн сөргөлдөгч талуудын төлөөлөл оролцсон Берлиний бага хурал болж байна. Ливийн үндэсний армийн командлагч Халиф Хафтар бямба гарагт Берлинд иржээ. Ливийн сөргөлдөгч талууд нэгдүгээр сарын 13-нд Москвад хэлэлцээр хийхээр ирсэн ч Халиф Хафтарын байр сууриас болоод зөвшилцөж чадалгүй, хэлэлцээрт гарын үсэг зуралгүй буцсан юм. Халиф Хафтар тэгэхэд хэлээлцээрээ үргэлжлүүлж, энхийн хэлэлцээрт гарын үсэг зурахын тулд тус оронд байгаа зэвсэгт бүлэглэлүүдийн зэвсгийг бүрэн хураахад 90 хоногийн хугацаа хэрэгтэй гэж шаарджээ.