Аугаа их Эх орны дайны ялалтын 75 жилийн ойг тохиолдуулан дайнд оролцсон ахмад дайчдад 75, ар талд хөдөлмөрлөж байсан ахмадуудад 50 мянган рублийн тэтгэмж олгоно гэж ОХУ-ын Ерөнхийлөгч Владимир Путин ахмад дайчид, эх оронч үзлийн төрийн бус байгууллагуудын төлөөлөлтэй уулзах үеэрээ мэдэгдлээ. Өмнө нь Ялалтын ойн баяраар ахмад дайчдад 10 мянга, ар талд хөдөлмөрлөж байсан ахмадууд таван мянган рублийн тэтгэмж олгодог байсныг Владимир Путин энд хэлсэн байна. Ялалтын 75 жилийн ой болж байгаатай холбогдуулан энх цагийг авчирсан ахмад дайчид, ар талд хөдөлмөрлөсөн хүмүүст энэ жил ийм хэмжээний тусламж дэмжлэг үзүүлэхээр шийдсэнээ В.Путин хэлээд энэ бол шударга үйл гэжээ.
ОХУ-ын Ерөнхийлөгч ялалтын ойд бэлтгэх, тэмдэглэн өнгөрүүлэхэд холбооны болон бүс нутгийн хэмжээнд онцгой анхаарч ахмад дайчдыг дэмжих, тэдэнд туслах талаар олон арга хэмжээ авч хэрэгжүүлнэ гэдэгт найдаж байгаагаа илэрхийлсэн байна. Тэр бас энэ ажилд сайн дурынхан маш их үүрэгтэй гэжээ. ОХУ-ын Хөдөлмөрийн яамны мэдээгээр бол, 2019 оны дөрөвдүгээр сар гэхэд Орост Дэлхийн хоёрдугаар дайны 1.2 сая ахмад дайчин байгаагийн 74 мянга нь байлдааны ажиллагаанд шууд оролцсон хүн юм байна. Энд ар талд хөдөлмөрлөсөн, фашистын хорих лагерьт байсан, Ленинградын бүслэлтэд байсан хүмүүс ордог байна. Тооцоогоор 2024 он гэхэд энэ ахмадын тоо 100 мянгаас хэтрэхгүй аж.