Гадаад орны жирэмсэн эмэгтэй Америкт ирж хүүхдээ төрүүлэн АНУ-ын иргэншил авдаг “Хүүхэд төрүүлэх жуулчлал”-ыг хориглохоо Ерөнхийлөгч Дональд Трампын засаг захиргаа энэ долоо хоногт зарлахаар төлөвлөж байгаа юм байна. Америкийн газар нутаг дээр хорвоод мэндэлсэн хүүхэд бүрт АНУ-ын иргэншил автоматаар олгодог “газар нутгийн эрх” нэртэй энэ журам Үндсэн хуулийн 14 дэх өөрчлөлтөөр хүчин төгөлдөр болж өнөө болтол үйлчилсээр иржээ.

 “The Hill” хэвлэлийн мэдээлснээр бол АНУ-ын Ерөнхийлөгч цагаачлалын тухай хууль тогтоомжийг чангатгах санаачилгынхаа хүрээнд, Америкийн иргэншил авахын тулд гадаадын жирэмсэн эмэгтэйчүүд зориуд АНУ-д ирж хүүхдээ төрүүлдгийг болиулах санаа гаргасан байна. Үүний тулд Дональд Трамп Ерөнхийлөгчийн тусгай зарлиг гаргах санал дэвшүүлжээ. Гэсэн ч уг санаа дэмжлэг авсангүй явсаар харин ч АНУ-ын Үндсэн хуульд өөрчлөлт оруулах хэрэгтэй болсон байна. “Жилээс жилд улам идэвхжиж нэмэгдсээр байгаа “хүүхэд төрүүлэх жуулчлал”-ыг өөрчлөх нь үндэсний аюулгүй байдлыг хангахад чиглэж байгаа юм” гэж Цагаан ордны энэ бодлогын талаар АНУ-ын Төрийн департамент сэтгүүлчдэд албан бусаар тайлбарласан байна. Гэхдээ үүнийг хэрхэн өөрчлөх талаар өнөө болтол тодорхойгүй байна.
Цагаачлалын талаарх мэдээллээр бол АНУ-д жил бүр 33 мянган жирэмсэн эмэгтэй ирж хүүхдээ төрүүлдэг юм байна. Ийм “жуулчдын” ихэнх нь Орос, Хятад, Нигерээс ирдэг гэнэ. Үүгээрээ АНУ өнөөдөр “хүүхэд төрүүлэх жуулчлал”-аар дэлхийд тэргүүлж байгаа юм.