Алан хядагч “Лалын улс” зэвсэгт бүлэглэлийн шинэ удирдагчаар түүний гол үзэл сурталчдын нэг Амир Мухаммед Саид Абдель Рахман аль-Мауля томилогджээ хэмээн тусгай албаны эх сурвалжаас авснаа Британийн The Guardian сонин даваа гаргийн орой өөрийн сайтаараа дамжуулан мэдээлжээ. Амир Абдель Рахман нь өнгөрөгч оны аравдугаар сарын сүүлчээр Сирийн Идлиб мужид АНУ-ын тусгай ажиллагааны үеэр амь үрэгдсэн, тус бүлэглэлийн өмнөх удирдагч Абу Бакру аль-Багдадитай ойр байсан энэ бүлэглэлийн удирдагчдын нэг хэмээн хэвлэл нэрлэж байна.

 Энэ Амир Абдель Рахманыг болон аль-Багдадийн ойрын нөхөд, хамтран зүтгэгчдийг барихын тулд АНУ-ын засаг захиргаа таван сая ам.долларын шагнал амлаж байсан. Хэвлэлд бичсэнээр өнөөгийн удирдагч нь аль-Багдадитай хоёул шоронд хоригдож байх үедээ 2004 онд танилцсан юм байна. Амир Абдель Рахман энэ бүлэглэлийг үндэслэн байгуулагчдын нэг бөгөөд түүний үзэл баримтлал, хэд хэдэн ажиллагааны төлөвлөгөөг боловсруулж байжээ. Түүний гол баримтлал нь Иракийн умард нутаг, Ниневийн тал нутаг дахь езидүүдийг устгахад чиглэсэн гэнэ. “Лалын улс” бүлэглэл өмнөх удирдагч аль-Багдади амь үрэгдсэнийг батлаад бүлэглэлийн шинэ удирдагчаар хэн нэгэн Абу Ибрагим аль-Хашими аль-Курейши томилогдсон гэж мэдээлсэн. Харин The Guardian сонин үүнийг худал гээд энэ талаар “Лалын улс” бүлэглэлийн ямар ч өндөр тушаалтан, барууны тусгай албадын шинжээч дурдаагүй гэж байгаа юм.

 Хэвлэлийн авсан мэдээллээр бол өмнөх удирдагчаа нас барснаас хойш хэдхэн цагийн дараа Амир Абдель Рахманыг энэ бүлэглэлийн удирдагчаар томилсон гэнэ. Одоо шинэ удирдагч өнөөдөр бүхэлдээ алан хядагчдаас бүрдэж, сүүлийн үед “Лалын улс”-тай нэгдсэн бусад бүлэглэлийн удирдлагуудыг нэгтгэхийг оролдож байна гэж The Guardian хэвлэлд бичсэн байна. Сонины ярилцагч шинэ удирдагчийн ах “Иракийн туркмений фронт” улс төрийн хөдөлгөөний төлөөлөгчөөр ажилладаг Турктэй холбоо барьж байгаа гэжээ. Хэвлэлийнхэнд яриа өгсөн эх сурвалж “Лалын улс” зэвсэгт бүлэглэлийн шинэ удирдагч Амир Абдель Рахманыг өмнө нь шариатын хууль судалж байсан Иракийн Мосулын хавьд нуугдаж байгаа гэсэн байна.