Украин улс өөрийн зүүн муж, өнөөдөр өөрийгөө Донецкийн бүгд найрамдах улс хэмээн тунхаглаад байгаа Донбассыг цэргийн хүч хэрэглэн, хүчээр өөрийн хяналтад авахад бэлэн байна гэснийг УНИАН агентлаг дамжууллаа. Украины Үндэсний аюулгүй байдал, батлан хамгаалах зөвлөлийн тэргүүний орлогч Сергей Кривонос нөхцөл байдлаас гарах ийм хувилбар байхыг үгүйсгээгүй байна. “Бид өөрийн газар нутаг, үндэстнээ чөлөөлөхөд бэлэн байх ёстой” гэж С.Кривонос хэлжээ.

 Улс төрийн ийм шийдвэр гаргахын өмнө хэд хэдэн арга хэмжээ авах нь чухал гэж тэр тэмдэглэсэн байна. Эндээ тэрбээр Оросын эсрэг хоригийг чангатгах, цэрэг армиа бэхжүүлэх, Украины газар нутгийн батлан хамгаалах тогтолцоог боловсронгуй болгож хөгжүүлэх зэргийг нэрлэжээ. Түүнийхээр бол ийм шийдвэр гаргах идэвхжил нь өөрийн улстөрчид, гадаад орнуудын дэмжлэгээс хамаарч байгаа гэнэ.