“Украины олон улсын агаарын шугам” компанийн Boeing онгоцыг Тегеранаас хөөрсний дараа “газар-агаар” ангиллын пуужингаар харвасан байна гэж ослын шалтгааныг мөрдөн шалгах хэсгийн урьдчилсан тайлангаас Bloomberg авч мэдээлжээ. Энд өгүүлснээр бол Boeing 737-800 онгоц руу умардын чиглэлээс зенит пуужингийн “Тор-М1” цогцолбороос пуужин харвасан байна гэнэ. Онгоц Тегераны нисэх буудлаас орон нутгийн цагаар 06:12 цагт хөөрснөөс гурван минутын дараа радараас алга болсон байна.

 Нисгэгчдийн бүхээгийн микрофон, нислэгийн мэдээллийг бүртгэх тоноглол нь өнөөдөр дэлхий дээр хамгийн тэргүүний технологи болохоор үүний тайлах хэрэгсэл Иранд байхгүй гэж тайланд тэмдэглэжээ. Нислэгийн үйл явдлыг мөрдөн шалгадаг Франц, Америкийн агентлаг тоноглолын бичлэгийг Иранд илгээхээс татгалзсан байна.
Онгоц нислэг саатсан тухай Ираны тал мэдээгүй гэж шинжээчид өмнө нь мэдэгдсэн. Зенит пуужингийн цогцолборын оператор C4I товчлуураа унтраагаагүй байсан, систем автоматаар тагнуул, удирдлагын горимд шилжсэн байсан, нөгөө талаар Тегераны нисэх буудлаас онгоц хөөрөх тухай мэдээлэлгүй байжээ.

 Ираны тал нэгдүгээр сарын 14-нд сүйрсэн онгоцны хар хайрцгийг шинжлүүлэхээр Франц руу илгээлээ гэж мэдээлсэн. Дараа өдөр нь Киев хар хайрцгийг өгнө үү хэмээн Тегеранаас шаардсан юм. Ираны тал болохоор хар хайрцгийг унших боломжгүй гээд түүнийг шилжүүлэхийг зөвшөөрсөн байна. Украин харин Франц, Канад, АНУ-ын шинжээчдийн тусламжтайгаар уншихыг оролдсон ч чадалгүй Парис руу шилжүүлсэн.

 Энэ нэгдүгээр сарын 8-нд Украины агаарын тээврийн “Украины олон улсын агаарын шугам” компанийн Boeing 737-800 онгоц Тегераны нисэх буудлаас хөөрснийхөө дараа сүйрсэн. Ираны тал алдааны улмаас оноцыг сөнөөснөө нэгдүгээр сарын 11-нд хүлээн зөвшөөрсөн. Онгоц сүйрсэн бурууг Ираны сансар агаарын хүчний командлагч Амир Али Хажизаде өөртөө хүлээсэн байна.