Ливаны Ерөнхийлөгч Мишель Аун Ерөнхий сайд Хассан Диябын эмхлэн байгуулсан шинэ Засгийн газрын танхимыг баталсан байна. Энэ шинэ танхим 20 сайдаас бүрдэж байгаагийн дотор таван эмэгтэй байгаагийн нэг нь Батлан хамгаалахын сайд болжээ. Шинэ Засгийн газрын энэ бүрэлдэхүүний олонх нь нэг их нэрд гараагүй голдуу эрдэмтэд, зөвлөх байсан хүмүүс гэж AFP хэвлэл мэдээлж байна. Шинэ Ерөнхий сайд Хассан Дияб өөрийнхөө Засгийн газрыг эсэргүүцэгчдийн шаардлагыг биелүүлэхийн төлөө ажиллана гэж мэдэгдээд сайдуудаа “аврах баг” гэж нэрлэсэн байна. Х.Дияб эхний гадаад айлчлалаа Ерөнхий сайдын хувьд Персийн булангийн орнуудад хийнэ гэдгээ ч бас хэлжээ.

 Засгийн газрын шинэ танхимыг зарласны дараагаар нийслэл Бейрут болон Ливаны бусад хотуудад Засгийн газрын эсрэг жагсаал цуглаан болж эхэллээ гэж РИА Новости агентлаг мэдээлж байна. Засгийн газар төсвийн цоорхойг нөхөхийн тулд шинэ татвар бий болгосон, эдийн засаг онц байдалд орсон гэдгээ Ливаны Засгийн газар зарласнаас үүдээд өнгөрөгч оны аравдугаар сараас нийслэл Бейрут, бусад хотуудад эсэргүүцлийн жагсаал, хөдөлгөөн өрнөсөн юм. Засгийн газрын үйл ажиллагаанд дургүйцсэн хэдэн зуун мянгаас нэг сая хүртэл хүн гудамжинд гаран эсэргүүцлээ илэрхийлж байгаа юм байна.