Украины парламент Дээд Радагийн депутат асан Рефат Чубаров тус улсын “Тавдугаар суваг” телевизэд өгсөн ярилцлагадаа Крымын татарууд тавдугаар сарын 2-нд Крымын хилийн шалган нэвтрүүлэх “Чонгар” боомтоор хил давж марш хийнэ гэж мэдэгджээ. Украины нутгаас Крымын хойг руу хийх явган маршийн тэргүүн эгнээнд “Крымын татаруудын Межлис”-ийн тэргүүнүүдийн төлөөлөл явна гэж Р.Чубаров онцолсон байна. Тэдэнтэй хамт ардын депутатууд, бас “барууны түншүүд” явах юм байна. Р.Чубаров энэ үеэр хүчний ямар нэг үйл явдал болохыг үгүйсгэсэнгүй.

 Крымыг Орос эзэлсэн явдлыг буруушааж байгаа олон улсын байгууллагууд энэ үеэр үүнийгээ батлах боломжтой гэж Р.Чубаров онцолжээ. Түүнийхээр бол Крымыг өөртөө нэгтгэсэн Орос крымын татаруудыг хойгоос шахан гаргаж байгаа нь тэдний оршин тогтнох, амьдрах эрхийг зөрчиж байгаа гэнэ.

Р.Чубаров Крымын хойг руу явган марш хийхээр бэлтгэж байгаа нь өнгөрөгч 2019 оны арванхоёрдугаар сарын 6-нд тодорхой болсон. Энэ ажиллагаагаа тэд “Дэлхий дахин хүчирхийлэл, эзлэн түрэмгийллийн эсрэг байна. Нэр төрийн марш” гэж нэрлэжээ. Энэ маршид янз бүрийн орнуудын иргэд оролцоно гэж Р.Чубаров хэлээд Межилис гадаад орнууд, НҮБ-ын дэргэдэх олон улсын шүүх, Европарламентын депутатууд, олон улсын бусад бүтцэд оролцогсдод хандана гэж мэдээлжээ. Энэ марш, арга хэмжээний гол зорилго нь крымын татаруудад тулгараад байгаа асуудалд анхаарал хандуулах явдал гэж Р.Чубаров хэлсэн байна.

 Харин Орос энэ арга хэмжээг өдөөн хатгалга гэж үзэж байна. ОХУ-ын Холбооны зөвлөлийн олон улсын асуудал эрхэлсэн хорооны даргын орлогч Владимир Жабаров “Хил найдвартай хамгаалалттай болохоор крымчүүд айх хэрэггүй” гэжээ. Крымыг ОХУ 2014 онд бүх нийтийн санал асуулгаар өөртөө нэгтгэсэн. Харин Украин үүнийг крымын татаруудын эрхийг зөрчиж, газар нутгийг нь булаасан хэрэг гэж Москваг буруутгасаар өнөөг хүрч байгаа. Орос энэ буруутгалыг няцаасаар байгаа.