ОХУ-ын Ерөнхийлөгч Владимир Путин Липецк мужид ажиллаж, иргэд хөдөлмөрчдийн төлөөлөлтэй уулзах үеэрээ “Оросыг парламентын бүгд найрамдах улс болгож болох уу?” гэсэн асуултад Оросын хувьд засаглалын тийм хэлбэр тохиромжгүй гэж хариулсан байна. “Манайх засаглалын ийм хэлбэртэй байж болох уу? Онолын хувьд болох юм. Гэхдээ болох уу, үгүй юү? Энэ талаар хүн бүрт өөр өөрийн бодол бий. Харин миний хувьд бол боломжгүй” гэж В.Путин Липецк мужийн иргэдийн асуултад хариулсныг мэдээллийн ТАСС агентлаг эш татжээ. Ийм зүйлийг туршихгүй байхыг В.Путин зөвлөөд, Европын зарим оронд парламентын тогтолцоо тохирохгүй байгааг хэлсэн байна. Тухайлбал улс төрийн тогтолцоо, тогтвортой дэд бүтэц байгаа ч засгийн газраа байгуулж чадахгүйд хүрэх юм уу, намууд эвсэл байгуулахад эсрэг бодлого зорилготой намууд эвсэх явдал гарч байна гэжээ. Ерөнхийлөгч В.Путин нэгдүгээр сарын 15-нд Холбооны зөвлөлд илгээсэн илгээлтдээ өргөн уудам газар нутагтай, олон үндэстэн нэгдсэн, соёл түүхийн олон төрлийн уламжлалтай манай орны хувьд засаглалын парламентын бүгд найрамдах улсын хэлбэрээр хэвийн хөгжих боломжгүй юм гэсэн. Түүнийхээр бол Орос улс хүчтэй Ерөнхийлөгчийн засаглалтай хэвээр байх ёстой.