Шведийн байгаль хамгаалагч идэвхтэн сурагч Грета Тунберг Давост болж байгаа Дэлхийн эдийн засгийн форум дээр манай гараг галын дунд байна. Үүнээс сэргийлэхийн тулд байгаль орчноо хамгаалахын тулд улс орнуудын удирдлагууд юу ч хийхгүй байна гэж шүүмжлээд та нар өөрсдийн үр хүүхдэдээ цаг уурын сүйрэл үлдээх гэж байна хэмээн асуусан. Үүнд АНУ-ын Ерөнхийлөгч Дональд Трамп хариулж Давост болсон хэвлэлийн бага хурал дээр “АНУ бол бусад орнуудыг бодвол экологийн сайхан нөхцөлд байгаа орон” гэж хариуллаа гэж Интерфакс агентлаг дамжуулсан байна.

 Д.Трампынхаар бол бусад тив, улс орнууд энэ талаар ажиллах ёстой. Бусад орнуудын хог хаягдал номхон далайн давлагаагаар АНУ-ын эрэг орчимд хүрч бохирдуулж байгаа гэнэ. Time сэтгүүл 2019 оны хүнээр Грета Тунбергийг шалгаруулсны төлөө Дональд Трамп өнгөрөгч оны арванхоёрдугаар сард түүнийг шүүмжилж “Зүгээр л тэнэг явдал. Грета өөрийнхөө хийх ёстой зүйлийг хийж, найзуудтайгаа кино үзэж байх хэрэгтэй. Грета минь тайван бай, тайвшир” гэж Twitter-тээ бичиж байсан. Г.Тунберг 2019 оны есдүгээр сард Байгаль орчны асуудлаарх НҮБ-ын дээд хэмжээний чуулган дээр үг хэлснээрээ дэлхийн байгаль хамгаалах хөдөлгөөний тэргүүний нэг болсон. Шведийн энэ сурагч охин цаг уурын өөрчлөлтөд нөлөөлж байгаа асуудлуудыг шийдэх талаар дорвитой ажил хийхгүй байгаагаараа өөрийнх нь хүүхэд насны амьдралыг үгүй хийж байна гэж шүүмжилсэн байна. АНУ 2017 оны наймдугаар сард цаг уурын талаарх Парисын хэлэлцээрээс гарснаа мэдэгдсэн. 2015 онд баталсан энэ хэлэлцээрээр цаг уурын өөрчлөлтийн асуудлыг шийдвэрлэхийн тулд хөгжингүй орнууд 100 тэрбум ам.доллар гаргаж байхаар заасан байдаг.