АНУ-ын Ерөнхийлөгч Дональд Трамп энэ сарын 28-нд Израйль, Палестины нутаг дэвсгэрт зэрэгцээ хоёр тусгаар улс байгуулах замаар Ойрхи Дорнодод энх тайвныг тогтоох төлөвлөгөө танилцууллаа. Цагаан ордны тэргүүн Израйлийн Ерөнхий сайд Бенжамин Нетаньяхутай уулзсаныхаа дараа хэлсэн үгэндээ шинэ төлөвлөгөөний дагуу Палестины тусгаар улсын газар нутаг одоогийнхоосоо бараг хоёр дахин нэмэгдэж байгаа гэжээ. Төлөвлөгөө ёсоор Йордан голын баруун эргийг Палестинчуудад өгөх ч энд бас Израйлийн суурьшлын бүсийг зөвшөөрөх ёстой гэнэ.

 Дональд Трампын төлөвлөгөөг дэлхийн олон орны удирдагчид биелэгдэх боломжгүй гэж үзэж байна. Д.Трамп шинэ төлөвлөгөөг Израйлийн тал таатай хүлээн авчээ. Харин Палестины эрх баригчид хүчтэй эсэргүүцэж байна. Палестины тэргүүн Махмуд Аббас шуурхай хурал зохион байгуулж, АНУ-ын шинэ төлөвлөгөөний талаар хэлэлцжээ. Тэрээр Д.Трампын төлөвлөгөөнд мянган удаа үгүй гэж хэлэхээ мэдэгдээд “Түүхийн хогийн саванд хаягдах зүйл” гэж шүүмжилсэн байна. Махмуд Аббас үндэснийхээ телевизээр үг хэлэхдээ Ойрхи Дорнодын байдлыг зохицуулах АНУ-ын төлөвлөгөөг хуйвалдаан гэж нэрлэжээ. “Иерусалим худалдагдахгүй, та нарын хуйвалдаан ч хэрэгжихгүй. Палестины ард түмний түүхэн эрхийг үл тоомсорлохыг бид зөвшөөрөхгүй. Бид Иерусалим нийслэлтэй Палестин улс байгуулах төлөвлөгөөгөө тууштай баримтална” гэж мэдэгдсэн байна.

 Дональд Трампын шинэ төлөвлөгөөнд Иерусалим хотыг бүхлээр нь Израйлийн нийслэл болгох тухай заасан ч, тус хотын зүүн хагасын тодорхой хэсэгт Палестины шинэ улс өөрийн нийслэлийг байгуулах боломжтой гэжээ. Палестины тусгаар улс байгуулагдах үйл явцыг дуустал буюу дөрвөн жилийн хугацаанд Израйль улс жүүд иргэдийг Палестины газар нутагт нэмж суурьшуулах ажлаа зогсоох ёстой. Ингэснээр ирээдүйн Палестин улс Газын зурвас, Иордан голын баруун эрэг гэсэн хоёр салангид газар нутагтай болж байгаа ба тэдгээрийг туннель болон агаарын замаар холбох боломжтойг төлөвлөгөөнд заажээ.

 Олон улсын хамтын нийгэмлэг Палестин, Израйль хоёр улс зэрэгцэн орших нь Ойрхи Дорнодод энх тайван байдал тогтоох гол шийдэл гэж үзсээр ирсэн байдаг. 1967 оны Араб-Израйлийн дайны дараа Израйль улс палестинчуудын нутаг болох Йордан голын баруун эргийг эзлэн авч, жүүд иргэдийг суурьшуулах болсон юм.