Европын холбоо Оросын долоон иргэнийг 2019 оны есдүгээр сард болсон Крымын Төрийн зөвлөлийн хууль бус сонгуулийг зохион байгуулах, туслалцаа үзүүлснийх нь төлөө хоригт оруулсан байна. Хоригийг энэ нэгдүгээр сарын 28-нд Брюссельд болсон Европын холбооны Гадаад харилцааны зөвлөлийн хурлаар баталж хүчин төгөлдөр болгожээ. Европын холбооны албан ёсны сэтгүүлд нийтэлсэн мэдээлэлд “Энэ хүмүүс энэ сонгуулийн ажиллагаанд оролцсоноороо Украины газар нутгийн бүрэн бүтэн байдал, тусгаар тогтнолыг сарниулах үйл ажиллагааг идэвхтэй дэмжсэн юм” гэж тэмдэглэсэн байна.

 Энэ хүмүүсийн эсрэг хориг тавьснаар Европын холбооны эсрэг хориг дахь хүний тоо нийтдээ 177 болж байгаа юм. Хоригт орж байгаа хүмүүсийг Европын холбооны нутаг дэвсгэрт зорчихыг хориглохоос гадна европын активуудыг нь царцаасан байна. Энэ удаа Севастополь мужийн амбан захирагч Михаил Развожаев, тус мужаас Холбооны зөвлөлд сонгогдсон, парламентын дарга Екатерина Алтабаева нарын долоон хүн шинээр хоригт орж байгаа нь энэ.

 Харин Крымын бүгд найрамдах улсын Сайд нарын зөвлөлийн дарга Юрий Гоцанвк Европын холбооны энэ хоригийг инээдэмтэй зүйл гэсэн байна. Тэрбээр өөрийнхөө Facebook хуудсанд “Крым Орост нэгдээд зургаан жил болж байна. Хоригийн тухай ярих инээдтэй, бас эмгэнэлтэй байна. Европын хүнд суртлын машин ажиллаж байхад одоо яая гэх вэ. Тэд улс төрийн ашиг хонжоо хайж байна. Тэгээд юу болох вэ дээ” гэж бичжээ.