АНУ-ын Ерөнхийлөгч Дональд Трампын засаг захиргаа долоон орны иргэдийг улс орондоо нэвтрүүлэхийг хязгаарлах тухай ярьж байна гэж The Wall Street Journal болон Politico хэвлэлүүд мэдээллээ. Эцсийн эцэст Белорусс энэ жагсаалтад арай оролгүй үлджээ.

 Үлдэх зургаан орны иргэдийг хил нэвтрүүлэхгүй байх тухай баримт бичигт Дональд Трамп нэгдүгээр сарын 31-ний баасан гаргийн орой гарын үсэг зурсан гэж АНУ-ын Дотоодын аюулгүй байдлыг сайдын үүрэг гүйцэтгэгч Чед Вульф мэдэгдсэнийг Reuters агентлаг дамжуулссан байна. Ч.Вульфын хэлснээр бол энэ жагсаалтад Киргиз, Эритрей, Мьянмар, Нигери улсууд орж байгаа юм байна. Энэ дөрвөн улсын иргэдэд Америкт байнга оршин суухаар үлдэх цагаачлалын виз олгохгүй гэнэ. Үлдэх Судан, Танзанийн иргэдийн хувьд “Ногоон карт”-аар бас виз олгохгүй гэжээ.

 Албан тушалтны хэлснээр бол энэ улс орнууд аюулгүй байдлын стандарт хангах, АНУ-тай мэдээлэл солилцох шаардлага хангадаггүй учраас ийм хязгаарлалт тогтоож байгаа гэнэ. Тухайлбал энэ улсуудад паспортын технологи хангалтгүй, терроризм, гэмт хэрэгт сэжиглэгдэж байгаа хүмүүсийн талаар бүрэн мэдээлэл солилцдоггүй гэж Дотоодын аюулгүй байдлын сайдын үүрэг гүйцэтгэгч онцолсон байна. “Энэ улс орнууд бидний санал болгож байгаа наад захын шаардлагыг биелүүлж чаддаггүй” гэж Ч.Вульф хэлжээ. Сүүлийн хэдэн жилд Д.Трампын засаг захиргаа Иран, Ливи, Сири, Йемен, Сомали, Венесуэль, Умард Солонгос, Чад зэрэг улсын иргэдэд ийм хязгаарлалт тогтоосон.