Нидерландын Твенте дэх Улсын музей хакеруудын довтолгоонд итгэж ховор зураг худалдан авахаар гурван сая евро шилжүүлж алдсан хэрэг гарчээ. Музейн захирал Арнуд Оддинг хоёр жилийн өмнө Нидерландын Маастрихтэд болсон Европын урлагийн яармагийн үеэр Лондонгийн уран зураг сонирхогч, наймаачин Саймон Дикинсоны авчирсан Английн XIX зууны байгалийн зураач Жон Констеблийн “Хэмпстед-Хитийн байгаль” зургийг үзэж ихэд сонирхжээ.

 Ингээд зургийг худалдан авахаар электрон шуудангаар хэлэлцээр хийж зургийг 3.1 сая ам.доллароор худалдан авахаар тохиролцсон байна. Харамсалтай нь хакерууд тэдний захидлыг мэдэж музейн захиралд Дикинсоны нэрийн өмнөөс хэд хэдэн хуурамч захидал бичиж мөнгөө Хонконг дахь данс руу шилжүүлнэ үү хэмээн Оддингт итгүүлжээ. Ингээд мөнгөө шижлүүлэн хакеруудад алдсан байна. Музейнхэн Дикинсоныг кибер аюулгүй байдалд хайхрамжгүй хандсан гэж буруутгаж байгаа ч Дикинсоны өмгөөлөгчид болохоор музейнхэн мөнгө шилжүүлэхийн өмнө сайтар нягтлах ёстой байсан гэж байгаа гэнэ. Музейн захирал ч өөрийнхөө электрон шуудан ямар ч аюулгүй гэдэгт итгэлтэй байгаагаа хэлдэг байна.
Энэ оны нэгдүгээр сарын 30-нд шүүх музейнхний нэхэмжлэлийг хэрэгсэхгүй болгосон ч Арнуд Оддинг цаашид үргэлжлүүлэн шүүхдэж давж заалдахаар төлөвлөж байгаа гэнэ.