Өнгөрөгч оны арванхоёрдугаар сарын дундуур коронавирусийн аюулыг урьдчилан мэдэж, ойр тойрны хүмүүстээ сэрэмжлүүлж байсан эмчийг Хятадын эрх баригчид сүрдүүлж, чимээгүй байх үүрэг өгсөн талаар BBC агентлаг мэдээллээ.

Түүнийг Ли Вэнлиан гэдэг бөгөөд өдгөө 34 настай нүдний эмч аж. Тухайн үед эмнэлэгт хүргэгдэж ирсэн долоон өвчтөнөөс SARS-тай төстэй вирусийн шинж тэмдэг илэрч буйг ажиглаад цахим чатаар дамжуулан хамтран ажиллагсдадаа сэрэмжлүүлэг өгч байжээ.

Ли эмчийн сэрэмжлүүлсэн мессеж удалгүй сошиал орчинд тарсан ба Олон нийтийн аюулгүй байдлын хорооны ажилтнууд түүнтэй уулзаж, хоёр ч бичиг дээр гарын үсэг зуруулж авсан байна. Мөн, “Цаашид ийнхүү худал ярьж, хууль бус үйлдэл хийсээр байвал төмөр нударгын амтыг мэдрүүлнэ” хэмээн сануулсан тухай тэр ярьжээ.

Ингээд тэр БНХАУ-ынг Засгийн газараас уучлалт хүсэж, дахин ийм мэдээлэл олон нийтэд цацахгүй гэдгээ амласан байна. Гэвч тэр нүдний даралттай өвчтнийг эмчилж байх үеэрээ өөрөө коронавирусийн халдвар авчээ.