Польшид хоёр өдрийн айчлал хийж байгаа Францын Ерөнхийлөгч Эммануэль Макрон Дэлхийн хоёрдугаар дайны түүхийг Орос улс гуйвуулж байна хэмээн буруутгажээ. Тэрбээр Польшийн оюутнуудын өмнө үг хэлэхдээ Европын түүхийг гуйвуулах гэсэн талууд, зарим улс, улс төрийн намуудын элдэв оролдлогоос хамгаалж түүхээ мэдэж үүний эсрэг бат зогсох ёстой гэв. “Миний харж байгаагаар хамгийн том эрсдэл бол түүхэн ой санамжийг гажуудуулах явдал. Польшийн 1989 оны эрх чөлөөний хөдөлгөөний түүхийг гажуудуулахыг хардаг. ХХ зууны бүхий л түүхийг эргэн харах гэсэн Унгарын бодлогыг харж байна. Дэлхийн хоёрдугаар дайны түүхийг өөрчлөх, Польшийн ард түмнийг буруутгах гэсэн Оросын үйлдлийг харж байна. Та бидний тархинд түүхийг гуйвуулан оруулах гэсэн эрсдэлийг харж байна” гэж Францын төрийн тэргүүн хэлсэн байна.

 ОХУ-ын Ерөнхийлөгч Владимир Путин өнгөрөгч 2019 оны арванхоёрдугаар сарын дундуур Европын хэд хэдэн орон, ялангуяа Польш улс нацист Германтай хэлэлцээр хийж байсан тухай баримт нотолгоо Орост байгаа гэж мэдэгдсэн. В.Путин бас Дэлхийн хоёрдугаар дайны түүхийг гажуудуулахаас сэргийлэх хэрэгтэй гэсэн байна.

 Оросын Ерөнхийлөгч мөн Гуравдугаар рейх дэх Польшийн Элчин сайд еврейчүүдийг Африк руу илгээх төлөвлөгөөнийх нь төлөө Адольф Гитлерт хөшөө босгохоо амлаж байсныг дурджээ.
Оросын улстөрчдийнхөөр бол Европ түүхийнхээ энэ хэсгийг хүлээн зөвшөөрөхөд бэлэн биш байгаа гэнэ. В.Путины энэ үг Польшийн эрх баригчдын таашаалд нийцэхгүй байгаа болохоор Дэлхийн хоёрдугаар дайн эхэлсэн бурууг Зөвлөлт холбоот улсад тохох гэж В.Молотов, Риббентроп нарын гэрээг эш үндэс болгож байгаа юм хэмээн Оросын хэвлэлүүд бичиж байна.
Польшийн Гадаад хэргийн дэд сайд Павел Яблонский “Radio Zet”-д өгсөн ярилцлагадаа Дэлхийн хоёрдугаар дайны үед учруулсан хохирлын төлөөс болгож Варшав Оросоос нөхөн төлбөр нэхэх эрхтэй, энэ бол маргаангүй зүйл гэсэн байна.