Өнгөрөгч 2019 онд болсон эсэргүүцлийн хөдөлгөөн, жагсаал, мөн Хятад, АНУ-ын худалдааны дайны улмаас Хонконгийн эдийн засаг сүүлийн 10 жилд анх удаагаа унаж Дотоодын нийт бүтээгдэхүүний өсөлт 1.2 хувь боллоо гэсэн урьдчилсан төлвийг Хонконгийн засаг захиргаа мэдээлсэн байна. “2019 оны дөрөвдүгээр улиралд Хонконгийн Дотоодын нийт бүтээгдэхүүн өмнөх оны мөн үетэй харьцуулахад 2.9 хувиар буурч байна. Ингэснээр энэ үзүүлэлт хоёр улирал дараалан унасан харагдаж байна. Энэ бол 2009 оноос хойш анх удаагаа унаж байгаа үзүүлэлт” гэж мэдээлэлд дурджээ. Бүтэн улирлаар үргэлжилсэн эсэргүүцэл, хүчирхийлэл эдийн засаг ялангуяа аялал жуулчлал, бараа эргэлтэд хүчтэй нөлөөлж, үр дагавар нь өнөө болтол үргэлжилсээр байна гэж энд тэмдэглэжээ.
 Хонконгийн 2020 оны эдийн засгийн хөгжил нь дотоод болон гадаадын олон хүчин зүйл, нөхцөл байдлаас хамааралтай гэсэн төлөв харагдаж байна. Юуны түрүүнд эх газрын Хятад, АНУ хоёрын худалдааны харилцаа цаашид хэрхэхээс Хонконгийн төдийгүй дэлхийн эдийн засаг сэргэхэд ихээхэн нөлөөлнө. Хонконгийн хувьд бас нийгмийн төлөвшил нөлөөлөх нь мэдээж. Өнөөдөртөө бас л коронавирусийн тархалт нь Хонконгийн төдийгүй Азийн эдийн засагт нөлөөлсөөр байна.
 Хонконгт энэ сарын 4-нд коронавирусийн халдвар авсан анхны хүн нас барсан. Коронавирусийн халдвар тархахаас сэргийлж хилээ хаахыг шаардсан эмнэлгийн 2700 гаруй эмч, ажилтан энэ сарын 3-нд ажил хаясан юм. Үүний дараахан 39 настай эрэгтэй энэ халдварын улмаас нас баржээ. Тэрбээр нэгдүгээр сарын 21-нд Хятадын Ухань хот руу хоёр хоногоор яваад ирсэн юм байна.